Ўзбекистонда 2021 йилда 457 127 та доимий янги иш ўринлари яратилиши прогноз қилинмоқда. Бу ҳақда Президент томонидан 28 апрель куни имзоланган «2021 йилда янги иш ўринларини ташкил этиш ва аҳоли бандлигига кўмаклашиш бўйича давлат дастури тўғрисида»ги қарорида сўз боради.
Иш ўринларини инвестиция лойиҳаларини амалга ошириш ва ижтимоий инфратузилмани, якка тартибдаги тадбиркорликни ҳамда ҳунармандчиликни ривожлантириш, янги кичик корхона, микрофирмалар ташкил этиш ҳисобига яратилади.
2021 йилда меҳнат органлари томонидан 513,5 минг нафар фуқаронинг бандлигига кўмаклашиш ва иш берувчиларни рағбатлантириш бўйича хизматлар кўрсатилиши керак.
Бандликка кўмаклашиш давлат жамғармаси маблағлари ҳисобидан 2021 йилда аҳоли бандлигига кўмаклашиш учун қуйидаги миқдорларда субсидия, нафақалар ва микрокредитлар ажратилади:
- субсидиялар ажратиш учун – 92,3 миллиард сўм;
- ишсизлик нафақалари тўлаб бериш учун – 65,1 миллиард сўм;
- касбга тайёрлаш, қайта тайёрлаш ва малака ошириш харажатларини қоплаш учун – 40,6 миллиард сўм;
- янги иш ўринлари ташкил этишни назарда тутувчи кичик лойиҳаларни амалга ошириш учун тижорат банкларига ажратиладиган ресурслар учун – 125 миллиард сўм.
Изоҳ (0)