Ўзбекистонда коронавирусга қарши эмланганлар сони 700 минг кишидан ошди

Ўзбекистон ҳудудлари бўйлаб 29 апрель куни жами 71 775 киши COVID-19’га қарши эмланди, деб хабар бермоқда Соғлиқни сақлаш вазирлиги матбуот хизмати. Бу вакцинация бошлангандан бери энг юқори кўрсаткичдир.

Шу тариқа айни кунгача Ўзбекистонда коронавирус инфекциясига қарши эмланган фуқаролар сони 718 471 нафарга етди.

29 апрель кунидаги эмлаш кўрсаткичлари бўйича юқори ўринларни:

• Фарғона вилояти (16 838 нафар),
• Андижон вилояти (9230 нафар),
• Наманган вилояти (8787 нафар),
• Самарқанд вилояти (5801 нафар),
• Жиззах вилояти (5113 нафар) банд қилди.

Таъкидланишича, ҳозирга қадар жами эмланганлар сони бўйича рекорд кўрсаткич Фарғона вилоятида (105 158 нафар) қайд этилган. Наманган вилоятида бу кўрсаткич 75 477 нафарни, Андижон вилоятида эса 72 242 нафарни ташкил қилмоқда.

Аҳолининг хавф ости гуруҳларининг коронавирусга қарши эмлаш кўрсаткичлари қуйидагича:

• 65 ёш ва ундан катта фуқаролар — 343 532 нафар;
• тиббиёт ходимлари — 262 570 нафар;
• мактаб ўқитувчилари — 71 443 нафар
• мактабгача таълим муассасалари ходимлари — 22 876 нафар;
• сурункали касаллиги бор фуқаролар — 18 050 нафар.

Шу кунгача вакцина қабул қилган фуқароларнинг 323 772 нафари AstraZeneca, 391 478 нафари ZF-UZ-VAC2001 билан эмланган. Шунингдек, яқинда мамлакатга олиб келинган «Спутник V» (расмий номи «Гам-КОВИД-Вак») вакцинаси билан 3221 нафар 65 ёшдан ошган фуқаро эмланган. Ҳукумат июнь ойи охиригача 4 миллионга яқин, йил охиригача 7 миллион аҳолини коронавирусга қарши эмлашни режалаштирган.