Фавқулодда вазиятлар вазирининг биринчи ўринбосари Абдулла Қўлдошев 30 апрель куни АОКАда ўтказилган махсус брифингда Сардоба сув омборини қуриш учун ажратилган бюджет маблағларининг қанчалик қонуний сарфлангани юзасидан тергов давом этаётганини маълум қилди.
«Сардоба сув омборини лойиҳалаштириш, қуриш ва тўғоннинг эксплуатацияси жараёнида хато ва камчиликларга йўл қўйилганлиги ҳолати бўйича буюртмачи, лойиҳачи, қурилиш ташкилотлари ҳамда эксплуатация хизматининг 17 нафар мансабдор ва мутасадди шахслари жиноий жавобгарликка тортилган. Айни пайтда уларга нисбатан айблов хулосаси Олий суд муҳокамасига ўтказилган.
Ҳозирги вақтда сув омборини қуриш учун ажратилган бюджет маблағларининг қонуний сарфланганлиги юзасидан жиноят иши доирасида тафтиш ва тергов ҳаракатлари давом эттирилмоқда», — дея унинг сўзларини келтирмоқда «Дарё» мухбири Мадина Нурман.
ФВВ вакили мазкур воқеага дахлдор барча мансабдор шахсларнинг хатти-ҳаракатларига яқин кунларда суд томонидан ҳуқуқий баҳо берилиши, бу ҳақида жамоатчиликка қўшимча ахборот тақдим этилишини билдирган.
Эслатиб ўтамиз, Президент Шавкат Мирзиёев 2020 йил 5 май куни бўлиб ўтган видеоселектор йиғилишида Сардоба фожиаси бўйича «барча айбдорлар қонун олдида жавоб бериши»ни айтганди.
Қурилиш вазирлигининг Лойиҳа-қидирув ташкилотлари фаолиятини мувофиқлаштириш бошқармаси бошлиғи Насрулло Бобоев Сардоба сув омбори қайта қурилиши, бу бўйича ҳукумат қарори қабул қилинганини маълум қилганди.
Мавзуга доир: Сардоба сув омборини ким қурган?
Изоҳ (0)