«Ўзгидромет» май ойининг дастлабки икки кунида қандай об-ҳаво кузатилишини маълум қилди

Ўзбекистон ҳудудига 30 апрель куни Каспий денгизидан салқин ва бироз нам ҳаво кириб келиши бошланди, деб хабар бермоқда «Ўзгидромет».

Қайд этилишича шу куни кечга томон Тошкент, Самарқанд, Жиззах, Сирдарё вилоятларининг баъзи жойларда бироз ёмғир ёғиши, момақалдироқ бўлиши мумкин. Ҳарорат 25-28 даража атрофида бўлади.

1 май, шанба куни фақат республиканинг энг шарқий туманларида бироз беқарорлик сақланиб туради. Фарғона водийси вилоятларида ва тоғли туманларда кечаси ва эрталаб баъзи жойларда бироз ёмғир ёғиши, момақалдироқ бўлиши мумкин. Республиканинг қолган ҳудудларида ёғингарчиликсиз об-ҳаво бўлиши кутилмоқда. Ҳарорат ушбу даражада сақланиб туради.

2 май, якшанба куни Ўзбекистоннинг барча ҳудудлари бўйича кам булутли ва қуруқ об-ҳаво бўлиши кутилмоқда. Ҳаво ҳарорати 29-32 даражагача, жанубда 34-37 даражагача кўтарилади.

Дам олиш кунлари баъзи жойларда шамол 15-20 метр/секундгача кучайиши мумкин.