Тошкентда 101 ёшли отахон коронавирусдан соғайиб чиқди

Зангиота юқумли касалликлар шифохонасида коронавирусдан даволанаётган 101 ёшли отахон соғайиб чиқди, деб хабар бермоқда Соғлиқни сақлаш вазирлиги.

Маълум қилинишича, 20 апрель куни Зангиота 2-сон юқумли касалликлар шифохонасига 1920 йилда туғилган оққўрғонлик уруш ва меҳнат фахрийси, фуқаро Ф.Н. оғир аҳволда олиб келинган.

Беморда ўтказилган ПЗР тести натижалари мусбат чиққан, рентген текширувларида икки томонлама гидроторакс суюқлик аниқланган.

Яқинлари билан ўтказилган суҳбатдан беморда сўнгги 4 кун давомида касаллик белгилари — йўтал, тана, айниқса, оёқ-қўлларнинг қақшаб оғриши, тана ҳароратини фебрил даражагача ошиши, чарчоқ, ҳолсизлик, нафас олишнинг қийинлашуви, ҳансираш, юрак уришининг тезлашиши, иштаҳасизлик белгилари кузатилиб, сўнги икки кунда бу белгилар янада кучайиб борган.

Беморда ўтказилган ПЗР тести натижалари мусбат чиққан, рентген текширувларида ўпканинг сурункали обструктив бронхоэктатик касаллиги, пневмосклероз ҳамда ўнг томонлама зотилжам аниқланган.

Уйда беморнинг аҳволи оғирлашиб боргани сабабли Зангиота 2-сон юқумли касалликлар шифохонасига мурожаат қилган. Қабул бўлимида бемор МСКТ текширувидан ўтказилганда, ўпка тўқимасининг зарарланиши билан икки томонлама вирус этиологияли интерстициал зотилжам ташхиси қўйилиб, бемордан COVID-19 инфекциясига экспресс-тест олинган. Тест натижаси унда коронавирус инфекцияси билан зарарланиш борлигини тасдиқлаган. Шундан сўнг беморга зудлик билан даво чораларини кўриш мақсадида у бўлимга ётқизилган.

«Бўлимда беморнинг ёши улуғлиги инобатга олиниб, тезда биринчи ёрдам кўрсатилган ҳамда белгиланган халқаро стандартлар бўйича текширув ва даво муолажалари бошлаб юборилган. Беморнинг аҳволи оғир бўлишига қарамай, билимли, юқори малакали ҳамда ўз касбининг фидойилари бўлган шифокорларимизнинг саъй-ҳаракатлари, ўз вақтида ва тўғри ўтказилган текширув ва даво муолажалари аста-секин ўз натижасини кўрсатиб, отахоннинг аҳволи кундан кунга яхшиланиб борди. Даво муолажаларини мустаҳкамлаш мақсадида бир қатор тор соҳа мутахассислари – инфекционист, пульмонолог, кардиолог, неврологлар ҳам жалб қилинди», — дейилади вазирлик хабарида.

Қайд этилишича, 101 ёшли бемор отахон коронавирусдан буткул соғайиб, ўз уйига рухсат берилган. 23 март куни Тошкентда 99 ёшли онахон коронавирусдан соғайиб чиққанди.

Эслатиб ўтамиз, Ўзбекистонда 29 апрель куни коронавирус инфекциясини юқтириб олиш билан боғлиқ 402 та янги ҳолат рўйхатга олинди — бу кунлик касалланиш кўрсаткичи бўйича 2021 йилнинг энг юқори кўрсаткичидир. Шунингдек, 2 нафар коронавирусга чалинган бемор вафот этиб, касалликдан вафот этганлар сони 649 нафарни ташкил қилмоқда. Айни пайтда тиббиёт муассасаларида 3092 нафар бемор даволаняпти.