Қашқадарё ҳокими Зоир Мирзаев Қарши шаҳрида 1 миллиард 350 миллион сўмга қуриб битказилиши мўлжал қилинган байроқ устундан воз кечди ва байроқ учун мўлжалланган маблағни хароба ётоқхонага сарфлашини маълум қилди. Бу ҳақда вилоят ҳокимлиги ахборот хизмати хабар берди.
«Аввало, ушбу масалани кенг жамоатчилик эътиборига олиб чиққан ОАВларга раҳмат. Ҳар биримизнинг Ватанимизга бўлган муҳаббатимиз чексиз. Рамзлари ҳам қадрли. Лекин бунинг учун халқдан, тадбиркорлардан келаётган маблағ эвазига бу қийматдаги қурилишни бугунги вазиятда сарфлаш бефойдадек, чоғи. Бу фикрни ижтимоий тармоқларда кўпчилик юртдошларимиз ҳам билдириб ўтишибди.
Ўзим ҳам даволанишда бўлганим сабабли шифохонада ушбу хабарни ўқиб қолдим. Муҳтарам юртбошимизнинг талаб ва мақсадлари халқни рози қилиш, халқнинг яшаш шароитларини яхшилашдан иборат бўлиб турган бир пайтда бу каби қурилиш ишларига ўзим ҳам қаршиман.
Ҳар куни аҳолининг яшаш шароитларини яхшилаш мақсадида туман ва шаҳарларда бўламан. Яқинда Қарши шаҳридаги 136-сонли оилавий ётоқхонага бориб, уйсиз фуқароларимизнинг мажбурликдан харобага айланган бинода қўним топгани мени қийнади. Мен билан ҳамроҳ бўлган раҳбарларнинг ҳам озроқ бўлса-да, виждони қийналган бўлса керак. Айримлари ҳаёт синовларини енгиб ўта олмаган бўлса ҳам, уларнинг шириндан шакар фарзандларида нима гуноҳ? Улар ҳам бахтли яшашга ҳақли», — деган Зоир Мирзаев байроқ воқеасига муносабат билдирар экан.
Вилоят ҳокими катта маблағга устун қуриш ҳақидаги фикр жамоатчилик жиғига тегганини таъкидлайди.
«Энг катта кечиримлиликни, меҳрни давлат раҳбаримизнинг ‘Меҳр’ операциялари кўрсатиб берди. Аёллар ва юзлаб бегуноҳ болалар юртимизга қайтарилган бир пайтда ёнимиздаги ётоқхона хароба аҳволда бўлса-ю, биз устун қурамиз, деб халқнинг жиғига тегиб ўтирсак. Ушбу хароба ётоқхонани таъмирлаш учун 2,5-3 миллиард сўм атрофидаги маблағ манбасини қаердан топишни билмай тургандим. Устун учун сарфланиши режа қилинган 1 миллиард 350 миллион сўмни ушбу ётоқхона таъмирига йўналтирамиз. Қолган маблағнинг ҳам манбасини топиб, ушбу ётоқхонани катта тантана билан топширамиз. Мустақиллигимизнинг 30 йиллик байрамига устун эмас, фуқароларимиз учун шинам хонадонлар туҳфа қиламиз. Хўш, нима дейсизлар?», — дея жамоатчиликка мурожаат қилган вилоят ҳокими.
Зоир Мирзаев устун қурилиши масаласига ҳам тўхталиб, «Бирор ҳомий томонидан ихтиёрий қўллаб-қувватлансагина қурилади. Давлат бюджетидан маблағ сарфланмайди», деган.
Эслатиб ўтамиз, аввалроқ Олий Мажлис депутати Дониёр Ғаниев Қаршида 1 миллиард 350 миллион сўмга қурилаётган байроқ устун масаласига эътибор қаратиб, 2020 йил Фарғонада ҳам шундай ташаббус илгари сурилганини, бироқ вилоят ҳокими байроқ устун қурилиши учун 1 миллиард сўм маблағ кераклигини эшитгач, ташаббускорларни ҳайдаб юборганини маълум қилганди. Қашқадарёлик блогер Умид Каримов эса вилоятнинг Деҳқонобод туманида қад ростлаган 40 метрлик байроқ 164 миллион 900 минг сўмга тушганини, кўриниши жиҳатидан шу байроқдан фарқ қилмайдиган 62,5 метрлик байроқ эса 1 миллиард 350 миллион сўмга баҳоланаётганидан ажабланишини ёзганди.
Мавзуга доир: Қаршида баландлиги 62,5 метрли байроқ ўрнатилади
Изоҳ (0)