Ўзбекистон Россиядан коронавирусга қарши вакцина етказиб беришни кўпайтиришни ва уни мамлакатда ишлаб чиқариш имкониятини кўриб чиқишни сўради. Бу ҳақда Ўзбекистон бош вазири Абдулла Арипов россиялик ҳамкасби Михаил Мишустин билан учрашувда айтиб ўтди, деб хабар берди «Gazeta.uz», «ТАСС»га таяниб.
Шу кунларда Қозон шаҳрида Евросиё иқтисодий иттифоқи ҳукуматлараро кенгашининг йиғилиши бўлиб ўтди. Мажлисда Ўзбекистон, Арманистон, Беларусь, Қозоғистон, Қирғизистон ва Тожикистон ҳукумат раҳбарлари иштирок этди.
«Сиздан унинг (‘Спутник V’- таҳр.) ҳажмини оширишни илтимос қиламиз. Биз шартноманинг ҳажмини оширишга тайёрмиз ва агар Ўзбекистонда вакцина ишлаб чиқаришни бошлаш имконияти мавжуд бўлса, хурсанд бўламиз», – деди Ўзбекистон бош вазири.
Абдулла Арипов таъкидлашича, «Спутник V» вакцинаси билан эмлаш Ўзбекистонда муваффақиятли бошланган. Соғлиқни сақлаш вазирлигининг маълумотларига кўра, 29 апрель ҳолатига 65 ёшдан ошган 1255 киши ушбу вакцина билан эмланган.
Россия бош вазири Михаил Мишустин ўз нутқида: «Биз ҳам ‘Спутник V’ вакцинасини Ўзбекистонда ишлаб чиқаришни йўлга қўйишга тайёрмиз» – деди.
Эслатиб ўтамиз, 27 апрель куни Ўзбекистонга «Спутник V» вакцинасининг иккинчи партияси 50 минг дозада олиб келинди. Шунингдек, 23 апрелга ўтар кечаси Ўзбекистонга «Спутник V» вакцинасининг биринчи партияси етказиб берилган эди (айнан қанча миқдорда вакцина олиб келингани маълум қилинмаган). Қайд этиш жоиз, Ўзбекистонга аҳолини эмлаш учун олиб келинадиган «Спутник V»нинг ярмини тадбиркор Алишер Усмонов молиялаштирган. Олдинроқ ушбу вакцинадан жами 1 миллион доза сотиб олиниши кўзда тутилгани маълум қилинган эди.
Изоҳ (0)