Наманганда хотинини мунтазам равишда қийнаб, уни уриб келган фуқарога нисбатан жиноий иш қўзғатилди. Ўзбекистонда зўравонликка қарши «Сукут сақлама» лойиҳасида қайд этилишича, эр тўйининг илк кунидан бошлаб хотинини тизимли равишда уриб келган, кейин арқонда боғлаб, кетмон дастаси сингунча калтаклаган.
Вилоят ИИБ матбуот хизматининг маълум қилишича, келиннинг онаси М.К. Тўрақўрғон тумани ИИБ бошлиғи номига ариза билан мурожаат қилиб, унда куёви, Тўрақўрғон туманида яшовчи А.Х. қизи У.Х.ни 2021 йил 12 апрель куни рашк сабабли уриб, тан жароҳати етказганини маълум қилиб, куёвига нисбатан қонуний чора кўришни сўраган.
Вилоят прокуратураси маълумотларига кўра, ҳолат юзасидан 14 апрель куни терговга қадар текширув ҳаракатлари бошланиб, У.Х. тан жароҳати олгани юзасидан судга оид тиббий экспертиза тайинланган.
Суд тиббий экспертизасининг 23 апрелдаги хулосасида келининг тан жароҳатлари кўкрак қафаси орқа юзаси чап ва ўнг томонларида тўқима дефекти билан бўлган яралар борлиги, кўкрак қафаси олд ва орқа юзаларида, елка камарида, ҳар иккала елкаларида, билакларида, қўл кафтларида, сонларида териости гематомалар борлиги, ҳар иккала кўз қовоқларида, юзида, кўкрак қафаси олд юзасида, бош тепа соҳасида қонталашлар аниқланган.
У.Х. баданидаги тан жароҳатларининг айримлари 10-15 сутка аввал, айримлари 2-3 сутка олдин қаттиқ ўтмас буюм таъсиридан, шунингдек, арқон таъсиридан ҳам келиб чиққани инкор этилмаган.
Аниқланган жароҳатлар соғлиқни қисқа вақт — 6 кундан кўп 21 кундан кам бўлган муддатга бузилишига олиб келадиган хусусиятга эга бўлгани учун оғирлик даражасига кўра, соғлиғининг бузилишига сабабчи бўлган енгил тан жароҳатлари тоифасига кириши кўрсатилган.
Терговга қадар текширув давомида А.Х. шаръий турмуш ўртоғи У.Х.ни рашк қилиши, унга ишонмаслиги, муттасил уни қийнаб, ўзининг яшаш хонадонида уриб, дўппослаб келиши аниқланган.
«Сукут сақлама»нинг ёзишича, келиннинг қайнсинглиси укасига хотининг эркаклар билан гаплашади, деб туҳмат қилган. Арқонда боғлаб, кетмон дастаси сингунча калтакланган келин ўлиб қолмаслик учун туҳматни ўз бўйнига олишга мажбур бўлган.
24 апрель куни ҳолат бўйича Тўрақўрғон туман ИИБ ҳузуридаги тергов бўлинмаси томонидан фуқаро А.Х.га нисбатан Жиноят кодексининг 109-моддаси 2-қисми (қасддан баданга енгил шикаст етказиш) билан жиноят иши қўзғатилган. 27 апрель куни эса А.Х. Жиноят кодексининг 109-моддаси 2-қисми ва 110-моддаси 1-қисми (қийнаш) билан гумон қилиниб, ушланган.
Эслатиб ўтамиз, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, Ўзбекистонда гендер тенглигини таъминлаш комиссияси аъзоси Саида Мирзиёева аёлларга нисбатан зўравонлик мавзусидаги янгиликлар кейинги кунларда умидсизлик занжирига боғланиб кетаётганини айтганди. Унинг фикрича, жамият разолат ва сукут учун, «аёлнинг ўзи айбдор» деган қараш учун жуда оғир бадал тўлаяпти.
«Қонунлар бор. Ҳамма қонун олдида бирдек жавоб бериши керак. Аёллар ва болаларга нисбатан зўравонликни ҳаққоний тергов қилиш масаласи бирламчи вазифалар қаторида бўлиши шарт. Жиноятчилар жазо муқаррар эканини билсин!», — деган эди у.
Мавзуга доир:
Изоҳ (0)