Олий Мажлис Қонунчилик палатаси депутати Расул Кушербаев Давлат солиқ қўмитаси ва унинг таркибий бўлинмалари ходимлари Бирлашган касаба уюшмаси уни судга берганига муносабат билдирди.
Эслатиб ўтамиз, Давлат солиқ қўмитаси Расул Кушербаевнинг «Human.uz» ахборот порталидаги «Сўз блогерларга» кўрсатувининг 23 февралдаги сонида айтган ҳақоратомуз сўзларини сабаб қилиб, Фуқаролик ишлари бўйича Шайхонтоҳур туманлараро судига даъво аризаси киритганди. Қўмита депутатдан 4,6 миллиард сўм маънавий зарар ундирмоқчи. Шунингдек, ОАВ орқали кечирим сўрашини талаб қилмоқда.
Кўрсатувда депутат «Оддий солиқ қўмитасининг ходими ёки мутахассиси юк хати нима учун керак бўлишини, ҳатто у шунчалик билмайдими ё тадбиркорлар, ё одамлар шунчалик аҳмоқ деб ўйлайдимики, ўзининг қилаётган ишини нотўғри эмаслигини исботлаши учун далил сифатида юк хатини кўрмоқчи… Пасткашлик бўлса, шунчалик бўладики, солиқ ходими тадбиркордан юк хатигача сўраяпти, уйидаги ‘туалетная бумагаънинг қанақасини ишлатишини ҳам сўрамабди-да… Солиқ органлари айланиб-ўргилиб тадбиркорни айбдор деб топишим керак, деган принцип кетяпти…», — деб айтганди.
Қўмита Расул Кушербаев ушбу сўзлар билан солиқ органлари ходимларини асоссиз айблаган ва ушбу хатти-ҳаракатлари орқали солиқ органлари ходимлари ишчанлик обрўсига путур етказган деб ҳисобламоқда.
Депутатнинг ўзи бу ҳақда «Podrobno.uz»га қуйидагича муносабат билдирган:
«Мен ҳеч кимни ҳақорат қилмадим, шунчаки танқид қилдим ва бирор бир давлат органи ноқонуний иш туца, танқид қилишда давом этаман. Аммо аниқ биламанки, яқинда Давлат солиқ қўмитаси раиси қўл остидаги ходимларини ҳақорат қилди. Агар ДСҚ касаба уюшмаси ҳаққоний бўлса, ходимларнинг шаъни ва қадр-қимматини ҳақиқатан ҳам ҳимоя қилса, у ҳолда аввал ДСҚ раисини судга бериши лозим».
Изоҳ (0)