Самарқанд вилояти ҳозирча Россиянинг «Спутник V» вакцинасисиз қолади. Чунки вилоятда уни сақлаш учун зарур бўлган музлаткичлар мавжуд эмас. Бу ҳақда «Самаркандский вестник» нашри хабар берди.
Самарқанд вилояти Санитария-эпидемиология таъминоти ва жамоат саломатлиги бошқармаси Иммунопрофилактика бўлими бошлиғи Шоира Халилованинг сўзларига кўра, вилоятдаги тиббиёт муассасаларида (оилавий поликлиникалар, қишлоқ врачлик пунктлари) рус вакцинасини сақлаш учун музлаткичлар ҳанузгача мавжуд эмас. Қўлланмага кўра, вакциналар -20 даражада сақланиши керак.
«Вилоятдаги музлаткичлар фақатгина +2 дан +8 даражагача бўлган ҳароратни сақлашга қодир», – деди Шоира Халилова.
Эслатиб ўтамиз, 27 апрель куни Ўзбекистонга «Спутник V» вакцинасининг иккинчи партияси 50 минг дозада олиб келинди. Шунингдек, 23 апрелга ўтар кечаси Ўзбекистонга «Спутник V» вакцинасининг биринчи партияси етказиб берилган эди (айнан қанча миқдорда вакцина олиб келингани маълум қилинмаган). Қайд этиш жоиз, Ўзбекистонга аҳолини эмлаш учун олиб келинадиган «Спутник V»нинг ярмини тадбиркор Алишер Усмонов молиялаштирган. Олдинроқ ушбу вакцинадан жами 1 миллион доза сотиб олиниши кўзда тутилгани маълум қилинган эди.
Изоҳ (0)