Қашқадарё вилоятининг Чироқчи туманида 1-синфда ўқувчи қиз ЙТҲ оқибатида вафот этгач, бир гуруҳ аёллар 23 апрель куни Қарши—Самарқанд йўлининг Хўжаобод қишлоғи ҳудудидан ўтувчи қисмини норозилик тариқасида тўсиб қўйганди.
Мазкур воқеа тафсилотларини ўрганишни мақсад қилган «Дарё» мухбири «йўлтўсар» аёллар ва туман ҳокими Хуррам Жўраев билан суҳбатлашди.
«Уч йилдан бери қишлоғимиз учун янги мактаб қуриб берилишини сўраб, барча ташкилотларга мурожаат қилдик. Ҳеч ким бизни тингламагач, шундай йўл тутишга мажбур бўлдик. 2021 йилнинг 21 апрель куни қизимнинг синфдошини машина уриб кетди ва ўша қиз ўлди. Воқеани ўз кўзи билан кўрган қизим эса анча вақт тушкун кайфиятда юрди. Қизим бир ҳафтадан сўнг мактабга чиқди. Биз фарзандларимиздан хавотирланиб, мажбурликдан шундай қилдик», — дейди 23 апрель куни «йўл тўсган» аёллардан бири Малоҳат Менгбоева.
Малоҳат Менгбоеванинг маълумот беришича, «йўл тўсиш» воқеасида қишлоқ аёлларининг 200 нафардан кўпроғи иштирок этган.
«‘Йўл тўсганъларнинг барчаси оналар эди. Биз фарзандларимиз тақдиридан хавотирга тушиб, шундай қилдик. Сабаби 1-синф ўқувчисининг ўлими бу биринчи ҳолат эмасди. Бундай воқеалар ҳар йили бир неча маротабалаб содир бўлади», — дейди «Дарё» мухбири билан суҳбатлашган аёллар.
Қашқадарё вилоят ИИБ Йўл ҳаракати хавфсизлиги бошқармаси бошиғининг биринчи ўринбосари Олим Хўжамуродовнинг маълумот беришича, 1-синф ўқувчиси билан боғлиқ ЙТҲ 2021 йилнинг 21 апрель куни, тахминан, соат 11:00 да содир бўлган.
«Isuzu ҳайдовчиси айни пайтда қўлга олинган ва унга нисбатан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган», — дейди Олим Хўжамуродов.
«Йўл тўсган» аёллар муаммо уч йилдан бери ҳал этилмаётганини айтиб, нафақат ҳоким, масъул ташкилотлар уларнинг дардига қулоқ тутмаганини билдирди.
«Биз фақат ва фақат болаларимизнинг мактабга бориб-келишидан қўрққанимиздан шундай ишга қўл урдик. Боиси, уч йилдан бери ҳокимга ҳам, бошқа ташкилот раҳбарларига ҳам болаларимиз мактабга ўтиб-қайтаётган хавфли йўлдан ўтиш учун ерости йўли ёки кўприк қуриб берилишини сўраб, қайта-қайта мурожаат қилдик. Аммо натижа бўлмади. 1-синф ўқувчиси билан бўлган фожиа биринчи маротаба эмас, охиргиси ҳам бўлмаса керак», — дейди «йўлтўсар» аёллар.
Чироқчи тумани ҳокими Хуррам Жўраев талаби бажарилмаганидан норози бўлиб, «йўл тўсган» аёллар гапини инкор қилиб, улар 1-синф ўқувчисининг ўлимидан таъсирланганини айтмоқда.
«Йўл тўсиб, норозилик билдирган хотин-қизларга Хўжаобод қишлоғидан янги мактаб қуриб берилаётганини, мактаб биноси 2021 йилнинг 1 сентябрь куни фойдаланишга топширилишини айтгандик. Назаримда, қишлоқ хотин-қизлари 1-синф ўқувчисининг ўлимидан қаттиқ таъсирланган кўринади», — дейди туман ҳокими Хуррам Жўраев.
Хуррам Жўраев Хўжаобод қишлоғида 260 та хонадон борлигини, аҳоли сони эса 300 нафардан ортиқлигини айтди. Қишлоқ аёллари эса қишлоқда 630 та хонадон вакиллари яшашини, хавфли йўлдан 800 нафардан ортиқ болалар мактабга қатнаётганини билдирди.
«1-синф ўқувчисининг ўлими қишлоқ аҳолисига қаттиқ таъсир қилганини биламиз. Аммо начора, тақдир шу экан. Лекин биз аҳолига берган ваъдамизни бажариб, шу қишлоқ учун алоҳида мактаб қуриб берамиз. Мактаб янги ўқув йилидан ишга тушади», — деди туман ҳокими Хуррам Жўраев.
Эслатиб ўтамиз, «йўлтўсар» аёллар воқеаси жамоатчиликка ошкор бўлгач, муаммони Сенат ўз назоратига олди. Сенат матбуот хизматига кўра, Олий Мажлиснинг юқори палатаси туманда яшовчи аҳоли вакилларини қийнаётган муаммолар юзасидан қилиниши лозим бўлган ишларни ўрганиб, натижалари юзасидан батафсил ахборот беради.
Изоҳ (0)