Qashqadaryo viloyatining Chiroqchi tumanida 1-sinfda o‘quvchi qiz YTH oqibatida vafot etgach, bir guruh ayollar 23-aprel kuni Qarshi—Samarqand yo‘lining Xo‘jaobod qishlog‘i hududidan o‘tuvchi qismini norozilik tariqasida to‘sib qo‘ygandi.
Mazkur voqea tafsilotlarini o‘rganishni maqsad qilgan “Daryo” muxbiri “yo‘lto‘sar” ayollar va tuman hokimi Xurram Jo‘rayev bilan suhbatlashdi.
“Uch yildan beri qishlog‘imiz uchun yangi maktab qurib berilishini so‘rab, barcha tashkilotlarga murojaat qildik. Hech kim bizni tinglamagach, shunday yo‘l tutishga majbur bo‘ldik. 2021-yilning 21-aprel kuni qizimning sinfdoshini mashina urib ketdi va o‘sha qiz o‘ldi. Voqeani o‘z ko‘zi bilan ko‘rgan qizim esa ancha vaqt tushkun kayfiyatda yurdi. Qizim bir haftadan so‘ng maktabga chiqdi. Biz farzandlarimizdan xavotirlanib, majburlikdan shunday qildik”, — deydi 23-aprel kuni “yo‘l to‘sgan” ayollardan biri Malohat Mengboyeva.
Malohat Mengboyevaning ma’lumot berishicha, “yo‘l to‘sish” voqeasida qishloq ayollarining 200 nafardan ko‘prog‘i ishtirok etgan.
“‘Yo‘l to‘sgan’larning barchasi onalar edi. Biz farzandlarimiz taqdiridan xavotirga tushib, shunday qildik. Sababi 1-sinf o‘quvchisining o‘limi bu birinchi holat emasdi. Bunday voqealar har yili bir necha marotabalab sodir bo‘ladi”, — deydi “Daryo” muxbiri bilan suhbatlashgan ayollar.
Qashqadaryo viloyat IIB Yo‘l harakati xavfsizligi boshqarmasi boshig‘ining birinchi o‘rinbosari Olim Xo‘jamurodovning ma’lumot berishicha, 1-sinf o‘quvchisi bilan bog‘liq YTH 2021-yilning 21-aprel kuni, taxminan, soat 11:00 da sodir bo‘lgan.
“Isuzu haydovchisi ayni paytda qo‘lga olingan va unga nisbatan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan”, — deydi Olim Xo‘jamurodov.
“Yo‘l to‘sgan” ayollar muammo uch yildan beri hal etilmayotganini aytib, nafaqat hokim, mas’ul tashkilotlar ularning dardiga quloq tutmaganini bildirdi.
“Biz faqat va faqat bolalarimizning maktabga borib-kelishidan qo‘rqqanimizdan shunday ishga qo‘l urdik. Boisi, uch yildan beri hokimga ham, boshqa tashkilot rahbarlariga ham bolalarimiz maktabga o‘tib-qaytayotgan xavfli yo‘ldan o‘tish uchun yerosti yo‘li yoki ko‘prik qurib berilishini so‘rab, qayta-qayta murojaat qildik. Ammo natija bo‘lmadi. 1-sinf o‘quvchisi bilan bo‘lgan fojia birinchi marotaba emas, oxirgisi ham bo‘lmasa kerak”, — deydi “yo‘lto‘sar” ayollar.
Chiroqchi tumani hokimi Xurram Jo‘rayev talabi bajarilmaganidan norozi bo‘lib, “yo‘l to‘sgan” ayollar gapini inkor qilib, ular 1-sinf o‘quvchisining o‘limidan ta’sirlanganini aytmoqda.
“Yo‘l to‘sib, norozilik bildirgan xotin-qizlarga Xo‘jaobod qishlog‘idan yangi maktab qurib berilayotganini, maktab binosi 2021-yilning 1-sentabr kuni foydalanishga topshirilishini aytgandik. Nazarimda, qishloq xotin-qizlari 1-sinf o‘quvchisining o‘limidan qattiq ta’sirlangan ko‘rinadi”, — deydi tuman hokimi Xurram Jo‘rayev.
Xurram Jo‘rayev Xo‘jaobod qishlog‘ida 260 ta xonadon borligini, aholi soni esa 300 nafardan ortiqligini aytdi. Qishloq ayollari esa qishloqda 630 ta xonadon vakillari yashashini, xavfli yo‘ldan 800 nafardan ortiq bolalar maktabga qatnayotganini bildirdi.
“1-sinf o‘quvchisining o‘limi qishloq aholisiga qattiq ta’sir qilganini bilamiz. Ammo nachora, taqdir shu ekan. Lekin biz aholiga bergan va’damizni bajarib, shu qishloq uchun alohida maktab qurib beramiz. Maktab yangi o‘quv yilidan ishga tushadi”, — dedi tuman hokimi Xurram Jo‘rayev.
Eslatib o‘tamiz, “yo‘lto‘sar” ayollar voqeasi jamoatchilikka oshkor bo‘lgach, muammoni Senat o‘z nazoratiga oldi. Senat matbuot xizmatiga ko‘ra, Oliy Majlisning yuqori palatasi tumanda yashovchi aholi vakillarini qiynayotgan muammolar yuzasidan qilinishi lozim bo‘lgan ishlarni o‘rganib, natijalari yuzasidan batafsil axborot beradi.
Izoh (0)