Сирдарёда 2021 йилнинг 1 июлидан 2022 йилнинг охирига қадар вилоят соғлиқни сақлаш тизимида тажриба-синов лойиҳаси доирасида апробациядан ўтказиладиган янги тизим, яъни давлат тиббий суғуртаси жорий этилади. Бу ҳақда ССВ матбуот хизмати хабар қилди.
Давлат тиббий суғуртаси тизими 2021 йилдан бошлаб босқичма-босқич жорий этилади. Биринчи босқич Давлат дастурида белгиланганидек, тажриба тариқасида Сирдарё вилояти тиббиёт муассасаларида, иккинчи босқич 2023 йилда Қорақалпоғистонда, Самарқанд, Навоий, Сурхондарё ва Фарғона вилоятлари ва Тошкент шаҳрида, учинчи босқич 2025 йилдан бутун мамлакат бўйлаб жорий этилади.
Қайд этилишича, бунинг учун Соғлиқни сақлаш вазирлиги ҳузуридаги Давлат тиббий суғуртаси жамғармаси ташкил этилган.
Тажриба-синов лойиҳасини амалга оширишга тайёргарлик доирасида жамғарма вилоят тиббиёт муассасаларида соғлиқни сақлашнинг янги моделини жорий этиш бўйича тайёргарлик ишларини бошлади.
Жумладан, лойиҳага Гулистон шаҳрида 5 та, Янгиер шаҳрида 2 та, Боёвут туманида 14 та бирламчи тиббий-санитария ёрдами муассасаси жалб қилинган.
Халқаро экспертлар иштирокида давлат томонидан кафолатланган бепул тиббий хизматлар пакетини ишлаб чиқиш, тиббиёт мутахассислари жамоаларини шакллантириш, шунингдек, аҳоли саломатлигини мониторинг қилиш учун ягона электрон платформани яратиш бўйича жойларда семинарлар ўтказилди. Махсус тиббий бригадалар тузилди, шифокорларнинг беморлар билан ишлаш механизми белгиланди.
Аҳолини рўйхатга олиш натижасида «электрон поликлиника» маълумотлар базасига Гулистон шаҳрининг 102 минг нафардан ортиқ, Янгиер шаҳрининг 42 минг нафар, Боёвут туманининг 123 мингдан ортиқ аҳолиси киритилди.
Таъкидланишича, соғлиқни сақлаш тизимини ташкил этишнинг янги модели жорий этилиши қўшимча молиявий маблағларни жалб этмаган ҳолда тиббий хизматлар сифатини оширишга хизмат қилади.
Бундан аввал Шавкат Мирзиёев соғлиқни сақлаш тизимини ташкил этишнинг Сирдарё моделини барча ҳудудларда жорий этиш бўйича кўрсатма бергани ҳамда Ўзбекистонда Сирдарё мисолида кафолатланган тиббий хизматлар ва дори воситалари пакетлари ишлаб чиқилиши ҳақида хабар берилганди.
Изоҳ (0)