Андижон вилоятида коронавирусга қарши қалбаки ПЗР-тест маълумотномаларини тайёрлаш билан шуғулланган 17 ёшли икки йигит қўлга олинди. Бу ҳақда ИИВ матбуот хизмати хабар берди.
Маълум қилинишича, Хўжаобод туманидаги ўрта мактабнинг 10-синф ўқувчилари бўлган М.У. ва Н.М. «Дўстлик» чегара назорат пости яқинида холис харидор сифатида жалб этилган 2 нафар фуқарога 110 минг сўмга ПЗР-тести маълумотномаси қилиб беришини айтиб, уларнинг фуқаролик паспортини олган. Орадан 20 дақиқа ўтиб, 2 дона COVID-19 таҳлил маълумотномасини олиб келиб бериб, келишилган пулни олган вақтида ИИБ тезкор ходимлари томонидан ушланган.
Тадбир давомида М.У.нинг уйи кўздан кечирилганида, 45 дона Андижон вилояти СЭОМ ғазна кирим ордери бланкаси, 30 дона COVID-19 инфекциясига текширилган тест натижаси ҳақида маълумотнома бланкаси ҳамда 1 дона ноутбук ва 1 дона рангли принтер борлиги аниқланган.
Ҳозирда ҳолат бўйича терговга қадар текширув ҳаракатлари олиб борилмоқда.
Аввалроқ Андижонда коронавирус инфекциясини текшириш учун мўлжалланган 34 дона сохта ПЗР-тестни сотишга уринган шахслар қўлга олингани, Фарғонада сохта ПЗР-тест маълумотномаси ва Россияда даволаниш учун таклифнома сотиш билан шуғулланган шахс ушлангани, Тошкент халқаро аэропортида сохта ПЗР-тест маълумотномасини сотаётган гуруҳ қўлга олингани ҳақида хабар берилганди.
Изоҳ (0)