Тошкент халқаро аэропортининг иккинчи қаватига олиб борадиган анчадан буён ёпиқ ётган эстакада йўлининг очилиши кутилмоқда. Бу борадаги режалар Президент Шавкат Мирзиёевга Uzbekistan Airways ва Uzbekistan Airports компанияларини трансформация қилиш борасидаги тақдимот давомида маълум қилинган. Президент матбуот котиби Шерзод Асадов 26 апрель куни ўтказилган брифингда бунга тўхталиб ўтган.
Президент вакилининг таъкидлашича, бу йўловчиларнинг аэропортга киришини енгиллаштиради.
«Трансформация жараёнида учта вазифага асосий эътибор қаратилмоқда. Булар: биринчидан, харажатларни қисқартириш, иккинчидан, даромадларни кўпайтириш ва учинчидан, йўловчи ва юк ташишда рақобатбардошикни ошириш.
Президент тақдимотлар билан танишиб, аввало, халқ учун авиачипталар нархини арзонлаштириш, чиптани сотиб олишдан то самолётга чиққунча бўлган барча жараёнларни тўлиқ рақамлаштириш бўйича топшириқ берди.
Яна бир янгилик – Тошкент халқаро аэропортига кириб боришдаги анчадан бери ёпиқ ётган эстакада йўли очилиши кутилмоқда. Бу ҳам йўловчиларга катта қулайликлар яратади, — деди Шерзод Асадов.
Шунингдек, Франция фуқаро авиацияси миллий мактаби билан биргаликда Тошкент давлат транспорт университети таркибида Фуқаро авиацияси учувчиларини тайёрлаш мактаби очилиши кутилмоқда.
Аввалроқ Uzbekistan Airports раҳбари Раънохон Жўраева Тошкент компаниянинг 2021—2022 йилларга мўлжалланган реконструкция дастурини тақдим этганди. Унинг ўтказиш қобилияти 2 бараварга оширилади (соатига 600 йўловчилдан 1200 йўловчига). Инвестицион фаолият, йўловчиларнинг дам олиши, умумий овқатланиш масканлари зоналари оширилади.
Эслатиб ўтамиз, 20 йилдан ортиқ (1999 йилда Тошкентда содир бўлган терактлардан сўнг) муддат давомида кутиб олувчи ва кузатувчилар пойтахт аэропортининг терминал биносига кириш имконига эга эмас ва ҳар қандай об-ҳаво шароитида ҳам ташқарида бўлишлари талаб қилинади. Халқаро аэропортда кутаётганлар учун айвон мавжуд, аммо маҳаллий авиатармоқлар терминали олдида одамлар кўчада кутишига тўғри келади.
Изоҳ (0)