Toshkent xalqaro aeroportining ikkinchi qavatiga olib boradigan estakada yo‘li ochiladi

Toshkent xalqaro aeroportining ikkinchi qavatiga olib boradigan anchadan buyon yopiq yotgan estakada yo‘lining ochilishi kutilmoqda. Bu boradagi rejalar Prezident Shavkat Mirziyoyevga Uzbekistan Airways va Uzbekistan Airports kompaniyalarini transformatsiya qilish borasidagi taqdimot davomida ma’lum qilingan. Prezident matbuot kotibi Sherzod Asadov 26-aprel kuni o‘tkazilgan brifingda bunga to‘xtalib o‘tgan.

Prezident vakilining ta’kidlashicha, bu yo‘lovchilarning aeroportga kirishini yengillashtiradi.

“Transformatsiya jarayonida uchta vazifaga asosiy e’tibor qaratilmoqda. Bular: birinchidan, xarajatlarni qisqartirish, ikkinchidan, daromadlarni ko‘paytirish va uchinchidan, yo‘lovchi va yuk tashishda raqobatbardoshikni oshirish.

Prezident taqdimotlar bilan tanishib, avvalo, xalq uchun aviachiptalar narxini arzonlashtirish, chiptani sotib olishdan to samolyotga chiqquncha bo‘lgan barcha jarayonlarni to‘liq raqamlashtirish bo‘yicha topshiriq berdi.

Yana bir yangilik – Toshkent xalqaro aeroportiga kirib borishdagi anchadan beri yopiq yotgan estakada yo‘li ochilishi kutilmoqda. Bu ham yo‘lovchilarga katta qulayliklar yaratadi, — dedi Sherzod Asadov.

Shuningdek, Fransiya fuqaro aviatsiyasi milliy maktabi bilan birgalikda Toshkent davlat transport universiteti tarkibida Fuqaro aviatsiyasi uchuvchilarini tayyorlash maktabi ochilishi kutilmoqda.

Avvalroq Uzbekistan Airports rahbari Ra’noxon Jo‘rayeva Toshkent kompaniyaning 2021—2022-yillarga mo‘ljallangan rekonstruksiya dasturini taqdim etgandi. Uning o‘tkazish qobiliyati 2 baravarga oshiriladi (soatiga 600 yo‘lovchildan 1200 yo‘lovchiga). Investitsion faoliyat, yo‘lovchilarning dam olishi, umumiy ovqatlanish maskanlari zonalari oshiriladi.

Eslatib o‘tamiz, 20 yildan ortiq (1999-yilda Toshkentda sodir bo‘lgan teraktlardan so‘ng) muddat davomida kutib oluvchi va kuzatuvchilar poytaxt aeroportining terminal binosiga kirish imkoniga ega emas va har qanday ob-havo sharoitida ham tashqarida bo‘lishlari talab qilinadi. Xalqaro aeroportda kutayotganlar uchun ayvon mavjud, ammo mahalliy aviatarmoqlar terminali oldida odamlar ko‘chada kutishiga to‘g‘ri keladi.