Римда Цезарь ўлдирилган жой сайёҳлар учун янги қадамжога айланади. Ушбу сайёҳлик объекти 2022 йилда тақдим этилади, деб ёзмоқда «Тенгритравел.кз».
Милоддан аввалги IV ва II асрларга тегишли бутхоналарнинг харобалари ва эрамиздан олдинги 45 йилнинг 15 март куни Цезарь ўлдирилган Помпей маъмурий бирлиги жойлашган Сакра майдони ҳозир ташландиқ жойга айланган. Ушбу харобалар 1920 йилда, ўрта асрларга тегишли барча бинолар Бенито Муссолинининг буйруғи билан вайрон қилинганидан кейин топилган. Унга яқинлашиш тақиқланиб, уни фақат ташқаридан кўриш мумкин эди. Тез орада бу жойни мушуклар бошпана қилиб олди. Ҳозир ҳайвонлар нодавлат пансионатлар ходимлари томонидан боқилади, стерилизация қилинади ва парваришланади.
France24 нашрининг ёзишича, Рим мэри Виржиния Рагги Сакра майдонининг очиқ осмон остидаги музей бўлишини маълум қилди. Қурилиш ва қайта тиклаш ишлари май ойининг ўрталарида бошланиб, бир йил давом этиши кутилмоқда. Қайта қуриш натижасида Помпей маъмурий бирлиги жойлашган жой тозаланади, унинг ўрнида замонавий йўлаклар қурилиб, улар диодли чироқлар билан ёритилади ва имконияти чекланганларга қулайлик яратади.
Махсус ёритиш тизими ўтаётган одамларнинг эътиборини улуғвор харобаларга қаратади, Сан-Никола-де-Чезарини яқинидаги ерости тақдимот майдонларида археологик топилмалардан иборат кўргазма ташкил этилади.
Виржиния Раггининг таъкидлашича, Рим ҳукумати коронавирус пандемияси тугаганидан кейин келадиган сайёҳларни кутиб олишга фаол тайёргарлик кўрмоқда. Объектнинг 2022 йилда очилиши туризмнинг янги тўлқини вақтига тўғри келиши мумкин. Шунингдек, мушукларнинг бошпанаси жойида қолиши ҳақида ҳам маълум қилинди.
Маълумот учун, Италия 2021 йилнинг ёз фаслида сайёҳлар учун очилиши мумкин.
Италиянинг бешта ҳудуди — Калабрия, Эмилия-Романья, Ломбардия, Пьемонт ва Тосканадаги хавф даражаси «қизил»дан «тўқ сариқ»га алмаштирилди. 26 апрелдан мамлакатнинг кўплаб ҳудудларида хавф даражаси «тўқ сариқ»қа ўтказилади ва «сариқ» ҳудудларда томошабинлар сонини чеклаш шарти билан музейлар, театрлар ва кинотеатрлар фаолияти қайта тикланади. Барлар ва ресторанлар ҳам очилиб, мижозларга очиқ ҳавода химзат кўрсатилади.
15 майдан эса пляжлар ва очиқ сув ҳавзалари ҳам ишга туширилади. Лекин май ойида соат 22:00 дан бошланадиган комендантлик соати сақланиб қолади. 1 июнгача умумий овқатланиш жойлари ёпиқ биноларда фаолиятини қайта бошлаши мумкин. Шу билан бирга, ёпиқ спорт заллари ва сузиш ҳавзалари ҳам қайта очилади.
Аввалроқ Сейшель ороллари ҳукумати 25 март куни карантин ва вакцинация сертификати талаб қилишни бекор қилиб, чет эллик сайёҳлар учун чегараларни очгани ҳақида хабар берилди.
Шунингдек, сайёҳлар учун тўлиқ очиқ бўлган мамлакатлар номи маълум қилинди. Унга кўра, ҳозир дунёда хорижий сайёҳлар учун коронавирус билан боғлиқ чекловларсиз фақат бешта мамлакат мавжуд. Шунингдек, 69 та мамлакат аввалгидек кириш учун ёпиқ. Ушбу маълумот Жаҳон сайёҳлик ташкилоти (UNWTO) томонидан берилган ҳисоботда эълон қилинди.
Изоҳ (0)