Россия ҳудудидан ўтувчи Амур дарёсида муз силжиши пайтида кўтарилган улкан муз бўлаклари Хабаровскдаги Утес посёлкаси қирғоғига чиқиб, темирбетон панжарани бузиб ташлади. Бу ҳақда «Интерфакс» хабар берди.
Хабарга кўра, ҳодиса қирғоқ бўйида юрган маҳаллий аҳоли гувоҳлигида юз берган. Муз бўлаклари пиёдалар йўлаги бўйлаб ёйилган. Дастлабки маълумотларга кўра, жабрланганлар йўқ.
Хабаровскда апрель ойи охири учун ғайритабиий илиқ об-ҳаво прогноз қилинмоқда. Ҳаво ҳарорати цельсий бўйича 23 даражагача исийди. Бир неча кун олдин дарё деярли бутунлай муздан тозаланди, аммо вақти-вақти билан Амурнинг юқори қисмидан муз оқиб келиши давом этмоқда. Бундан ташқари, Утес яқинидаги қирғоқда музлар тўпланиб қолган.
Узоқ Шарқ гидрометеорология маркази ходими Наталя Эфремованинг сўзларига кўра, қиш қорсиз келгани ва сув сатҳи юқори бўлгани сабабли Амур қирғоғига муз чиқади. «Бу йил Амур сатҳи меъёрдан 4 метр юқори, одатдаги баландлиги эса 1,5 га тенг. Шу ва қорнинг озлиги туфайли дарё суви 1,5 метр чуқурликда музлаб қолди», — деди у.
Хабаровск ўлкасининг прокуратураси қирғоқ юзасига муз массаларининг чиқиши, тўсиқларнинг бузилиши ҳамда аҳоли ҳаёти ва соғлиғига таҳдид пайдо бўлиши муносабати билан текширув ўтказишни маълум қилди.
Изоҳ (0)