Gurbanguli Berdimuhamedov o‘g‘li Serdar Berdimuhamedovni faxriy unvon bilan taqdirladi
Turkmaniston prezidenti Gurbanguli Berdimuhamedov 3-mart kuni Xavfsizlik kengashi huquq-tartibot idoralarining 2021-yilning so‘nggi ikki oyidagi ishlari natijalariga bag‘ishlangan yig‘ilish o‘tkazdi, deb xabar bermoqda “Xronika Turkmenistana”.
Qayd etilishicha, yig‘ilishda biron-bir muhim mavzu muhokama qilinmagan.
Mudofaa vaziri Begench Gundogdiyev 27-sentabr kuni Turkmaniston mustaqilligining 30 yilligi sharafiga bo‘lib o‘tadigan harbiy paradga tayyorgarlik to‘g‘risida hisobot berdi. Ta’kidlanishicha, 2021-yil paradni yangi hukumat maydoni oldida o‘tkazish rejalashtirilgan.
Prezident Ichki ishlar vazirligi rahbari Mammetxan Chakiyevga yo‘llarda huquqbuzarliklarni qat’iy nazorat qilishni va piyodalar, ayniqsa maktab o‘quvchilari o‘rtasida yo‘l harakati qoidalari to‘g‘risida tushuntirish ishlarini olib borishni topshirdi.
Bosh vazirning raqamlashtirish bo‘yicha o‘rinbosari, Oliy nazorat palatasi rahbari va Xavfsizlik kengashi a’zosi Serdar Berdimuhamedov davlat mulkini nazorat qilish va raqamli tizimlarni joriy etish bo‘yicha ishlar to‘g‘risida hisobot berdi. Xabarda qanday ishlar qilinganligi haqida ma’lumot berilmagan.
Berdimuhamedov hisobotlardan mamnun bo‘lib, Xavfsizlik kengashining barcha a’zolariga, jumladan, o‘g‘li Serdar Berdimuhamedovga “Turkmaniston Vatanining himoyachisi” faxriy unvonini berish to‘g‘risidagi qarorini e’lon qildi.
https://giphy.com/gifs/3y6UJStOzMxAQQOt5j
Eslatib o‘tamiz, ushbu unvon 2021-yil 16-yanvarda ta’sis etilgan va Xavfsizlik kengashi a’zolariga davlat mustaqilligi, suvereniteti, hududiy yaxlitligi, konstitutsiyaviy tuzum, qonuniylik va huquqni muhofaza qilishda katta xizmatlari bo‘lgan a’zolarga beriladi. Unga sazovor bo‘lganlar tegishli nishon bilan taqdirlanadi.
Avvalroq Sardor bosh vazir o‘rinbosari lavozimiga tayinlangandi. Shuningdek, biroz avval u Xavfsizlik kengashi a’zosi sifatida tasdiqlandi. Nashrning ma’lum qilishicha, u kengash a’zosi sifatida hali biron sezilarli ish qilmagan. Unga qaysi xizmatlari uchun unvon berilganligi ham noma’lum.
Shuningdek, Serdardan tashqari bir qator amaldorlarga mazkur unvon berildi.
Bundan avval Turkmaniston prezidenti poytaxtning yubileyi kuni tug‘ilgan birinchi chaqaloqqa Ashxobod deb ism qo‘yishni buyurgani, Turkmaniston birjasida prezident avtokarvonining zirhli mashinalari yana sotuvga qo‘yilgani hamda Berdimuhamedov Ashxobod yubileyi va Turkmaniston mustaqilligiga tayyorgarlik ko‘rish ishlaridan norozi bo‘lgani haqida xabar berilgandi.
