Жонс Ҳопкинс университети маълумотларига кўра, дунёда коронавирусга чалинганлар сони 143 874 360 кишига етди. Ушбу кўрсаткич бўйича АҚШ (31,8 миллион), Ҳиндистон (15,9 миллион), Бразилия (14,1 миллион), Франция (5,4 миллион) ва Россия (4,6 миллион) ҳамон юқори бешликдан тушмай келяпти.
COVID-19 оқибатида вафот этганлар сони 3 059 018 кишини ташкил қилмоқда.
Ҳиндистонда рекорд
Ҳиндистонда сўнгги бир кеча-кундузда 314 835 кишида касаллик аниқланди — бу дунё мамлакатлари орасида беморлар сонининг ўсиши бўйича рекорд кўрсаткич.
Касалланиш ҳолатларининг кўпайиши фонида Ҳиндистон касалхоналари қийин аҳволга тушиб қолди ва оғир беморлар учун кислород етказиб бера олмаяпти.
Коронавирус билан боғлиқ вазият энг мураккаб бўлган штатлардан бири Махараштрадир.
Мавзуга доир: Ҳиндистондаги COVID-19 касалхонасида 24 нафар одам газдан бўғилиб ҳалок бўлди (фото ва видео)
Париждаги «Диснейленд» кўнгилочар боғида 24 апрель кунидан коронавирусга қарши йирик вакцинация маркази очилади. У Disney’s Newport Bay Club конференц-марказида жойлашади.
Марказда кунига 1 минг нафарга одам эмланиши мумкин. У фақат дам олиш кунлари 09:30 дан 17:30 гача ишлайди.
Япония ва Эквадорда фавқулодда ҳолат жорий этиладиЯпонияда коронавирус билан касалланиш ҳолатлари кўпайгани сабабли Олимпиада бошланишига уч ой қолганида фавқулодда вазият режими жорий этилиши кутилмоқда. Ҳукумат Токиода, шунингдек, Осака ва Хиого префектураларида чекловларни кучайтиришни режалаштирмоқда.
Агар фавқулодда ҳолат режими киритилса, бу ўтган йил апрелидан буён ҳукумат томонидан қўлланган учинчи шундай чора бўлади. Ушбу режим доирасида ҳудудий ҳукуматлар дўконлар, мавзули парклар ва бошқа объектларни ёпиш имкониятига эга бўлади.
21 апрель, чоршанба куни Японияда 843 кишида коронавирус аниқланди. Бундан бир ҳафта аввал, 14 апрель куни 591 та ҳолат қайд этилганди. Шу тариқа жами касалланганлар 130 минг кишига етди, шуларнинг 1,8 мингга яқини вафот этган.
Мавзуга доир: Пандемия туфайли Токиодаги Олимпиада ўйинларига чет эллик томошабинлар киритилмайдиган бўлди
Ҳудудларда комендантлик соати жорий этилади, шунингдек, жума—якшанба кунлари бемалол ҳаракатланиб юриш тақиқланади.
Сўнгги маълумотларга кўра, Эквадорда коронавирусга чалинганлар сони 362 843 кишига етган, шуларнинг 12 795 нафари вафот этган.
Польша ва Грецияда чекловлар юмшатиладиПольшада эса 26 апрелдан карантин сусайтирила бошлайди. Сартарошхоналар ва гўзаллик салонлари очилади, 1—3-синф ўқувчилари аралаш шаклда ўқишни бошлайди.
Греция ҳам май ойи бошидан COVID-19’га қарши кураш мақсадида киритилган асосий чекловларни юмшатишга киришади.
3 майдан ресторанлар, бар ва кафелар очиқ ҳавода хизмат кўрсатишни бошлайди. 10 майдан бошланғич ва ўрта мактаблар очилади. 15 майдан эса ҳудудлараро қатновларга рухсат берилади.
АҚШда Байден президентлиги даврида 200 миллионта вакцина амалга оширилди
АҚШда Жо Байден президентлигига 100 кун тўлмасидан туриб коронавирусга қарши 200 миллионта вакцина амалга оширилди, шу тариқа, Оқ уй томонидан қўйилган мақсадга эришилди.
«Бугун, президент лавозимида ўтказган 92-кунимда 200 миллионта вакцина маррасига етдик. Бу халқ учун ҳайратланарли ютуқдир», — деди Байден.
Сохта вакциналар аниқланди
Мексика ва Польшада Pfizer компаниясининг коронавирусга қарши вакцинасининг сохта версиялари аниқланди. Мексикадаги клиникада қарийб 80 киши бир дозаси минг доллар бўлган қалбаки вакцина билан эмланган. Польшада эса вакцина идишларига аслида ажинга қарши дори солингани айтилмоқда.
Изоҳ (0)