Наманган вилояти Поп туманида бошқарувни йўқотган Damas ҳайдовчиси пастликка тушиб кетди. Бу ҳақда вилояти ИИБ ахборот хизмати хабар берди.
Маълум қилинишича, 19 апрель куни соат 23:30 ларда Чодак—Хонобод—Ғурумсарой йўлининг Поп тумани «Хонобод» МФЙ ҳудудидан ўтган қисмида Damas русумли автомашинани ишонч қоғози билан бошқариб кетаётган ҳайдовчи ҳаракат хавфсизлигини таъминлай олмай, йўлнинг чап томонига чиқиб кетган. Оқибатда ҳайдовчи бошқарувни йўқотиб, пастликка ағдарилиб тушган.
Ҳайдовчи оғир тан жароҳати олиб, воқеа жойида вафот этган.
Ҳозирда мазкур ҳолат юзасидан туман ИИБ ҳузуридаги Тергов бўлими томонидан терговга қадар текширув ҳаракатлари олиб борилмоқда.
Аввалроқ Тошкентда Nexia ва Matiz иштирокида содир бўлган ЙТҲ оқибатида икки киши ҳалок бўлгани, Навоийда Nexia уриб юборган велосипед ҳайдовчиси шифохонада вафот этгани, Наманганда Spark ағдарилиб кетиши оқибатида бир киши ҳалок бўлгани тўғрисида хабар берилганди.
Изоҳ (0)