Бухорода чорва молларини ўғирлаб кетган йигитлар қўлга олинди, дея хабар бермоқда ИИВ.
Бухоро вилоятининг Бухоро шаҳар, Бухоро ва Когон туманлари ҳудудида содир бўлган ўғриликларни фош этиш мақсадида тезкор-қидирув тадбирлари олиб борилган. Натижада чорва молларини ўғирлаб келаётган жиноий гуруҳнинг фаолиятига чек қўйилиб, ҳудудларда мавҳум ҳолатда содир этилган 5 та жиноят фош этилган.
Қайд этилишича, 2021 йилнинг 8 апрель куни Бухоро шаҳар «Лоша» маҳалласида яшовчи Ю.Ё.нинг қўйхонасидан баҳоси 1 000 000 сўмлик бир бош қўй, 11 апрель куни шаҳарнинг «Отбозор» маҳалласида яшовчи фуқаро Б.С.нинг қўйхонасидан ҳар бирининг баҳоси 1 000 000 сўмлик икки бош қўй, 12 апрель куни эса Когон туман «Когон» маҳалласида яшовчи фуқаро Р.А.нинг қўйхонасидан баҳоси 5 200 000 сўмлик 3 бош қўй ва 1 бош қўзи, 13 апрель кунидан 14 апрель кунига ўтар кечаси Бухоро туманидаги «Мустақиллик» маҳалласида яшовчи И.Қ.нинг қўйхонасидан ҳар бирининг баҳоси 1 300 000 сўмга тенг бўлган уч бош қўй, худди шу тунда туман марказидаги Зарафшон кўчасида яшовчи фуқаро Н.О.га тегишли бўлган ҳар бирининг баҳоси 1 800 000 сўмга тенг бўлган икки бош қўчқор яширин равишда ўғирлаб кетилганлиги тўғрисида ички ишлар органлари навбатчилик қисмларига хабарлар келиб тушган.
Ҳар бир хабар юзасидан тегишли туман ва шаҳар ички ишлар органларининг тергов-тезкор гуруҳлари ҳодиса содир бўлган жойга чиқиб, зарурий суриштирув ҳамда терговга қадар текширув ҳаракатларини олиб борган ҳолда, ушбу бешта ҳолат юзасидан Жиноят кодексининг 169-моддаси (ўғирлик) билан жиноят ишлари қўзғатилиб, дастлабки тергов ҳаракатлари олиб борилган.
Мазкур жиноятларнинг объектив ҳамда субъектив томонлари, жиноят содир этилишининг факултатив белгилари таҳлил қилинган ҳолда аниқланган умумий жиҳатлардан келиб чиқиб, вилоят Ички ишлар бошқармаси бошлиғининг 1-ўринбосари подполковник Мансур Қодиров бошчилигида вилоят Ички ишлар бошқармаси Жиноят қидирув бошқармаси ҳамда ушбу шаҳар ва туманлар ички ишлар органларининг ходимларидан иборат алоҳида тергов-тезкор гуруҳлари тузилиб, вилоят бўйлаб кенг миқёсли тезкор суриштирув, терговга қадар текширув ҳамда тергов ҳаракатлари олиб борилди.
Олиб борилган тезкор суриштирув ҳаракатлари давомида ушбу жиноятлар 3 нафар шахсдан иборат жиноий гуруҳ томонидан содир қилинганлиги аниқланди.
Жумладан:
- жиноий гуруҳ ташкилотчиси 1999 йилда туғилган муқаддам Жиноят кодексининг 109 (қасддан баданга енгил шикаст етказиш), 166 (талончилик), 169-моддалари (ўғрилик) билан судланган Бухоро тумани «Гала Осиё» маҳалласида яшовчи Ш.Ш. ўғрилик содир қилинадиган хонадонларни аниқлаб, кўздан кечирган ҳолда жиноий шерикларига вазифаларни тақсимлаб бериб, ўғрилик содир қилинадиган манзилларга бошлаб боргани;
- жиноий гуруҳнинг иккинчи аъзоси 1999 йилда туғилган муқаддам Жиноят кодексининг 277-моддаси (безорилик) билан судланган, Бухоро тумани «Нометан» маҳалласида яшовчи К.Ж. бўлиб, у жиноятларни содир этишда бевосита иштирок этиб, ўғирланган чорва молларини бошқарувидаги Matiz русумли автомашинасида бозорга олиб бориб, сотишда етакчилик қилгани;
- 1999 йилда туғилган Бухоро шаҳар «Отбозор» маҳалласида яшовчи Т.У. эса жиноий гуруҳнинг учинчи аъзоси бўлиб, бошқарувидаги оқ рангли Matiz русумли автомашинада ҳайдовчилик қилиб, жиноий шерикларини воқеа жойига олиб бориб келган.
Ҳозирда жиноий гуруҳнинг фош этилмай қолган бошқа жиноятларга алоқадорликларини аниқлаш мақсадида тезкор-суриштирув ҳамда жиноят ишлари бўйича дастлабки тергов ҳаракатлари давом эттирилмоқда.
Бундан аввал Олмазорда қарийб 36 миллион сўмлик тилла тақинчоқларини ўғирлатганини айтган аёлнинг ўзи бу ишни қилгани аниқлангани, Фарғонадаги Хизр бува зиёратгоҳига ташриф буюрганларнинг чўнтагидан пул ўғирлаган аёл ушлангани ҳамда Тошкентда тўлов терминалларини ўмариб кетганлар 5 йилга қамалгани ҳақида хабар берилганди.
Изоҳ (0)