Суднинг фермер хўжалиги фойдасига чиқарган қарори ижросини таъминламаган Шаҳрисабз тумани ҳокимининг ўринбосари жаримага тортилди. Бу ҳақда Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилнинг Telegram’даги канали орқали маълум қилинди.
Маълум қилинишича, Қашқадарё вилояти Шаҳрисабз туман ҳокимининг ўринбосари туманда фаолият юритувчи фермер хўжалиги манфаатига чиқарилган суд қарори ижросини таъминламагани учун 2020 йил июнда бизнес-омбудсман ходимлари томонидан расмийлаштирилган маъмурий баённома асосида жавобгарликка тортилган.
Шунга қарамасдан, туман ҳокими ўринбосари такроран қонун бузилиши ҳолатини содир этган. Хусусан, бизнес-омбудсманга «Унумдор ер» фермер хўжалиги (фермер хўжалигининг номи ўзгартирилган) мурожаат қилиб, маъмурий суднинг фермер хўжалиги манфаатига чиққан ҳал қилув қарори ижросини таъминлашда амалий ёрдам сўраган.
Ушбу ҳолат бўйича, бизнес-омбудсман томонидан фермер хўжалигига чиқарилган суд қарорини қонунда белгиланган тартибда ижро қилиш тўғрисида хулоса киритилган. Хулоса тегишли тартибда ижро қилиш учун туман ҳокимининг ўринбосарига йўналтирилган. Аммо ушбу ҳоким ўринбосари томонидан фермер хўжалиги манфаатида чиқарилган суд қарори ижросини таъминлаш чораси кўрилмаган.
Мазкур қонун бузилиши ҳолати юзасидан бизнес-омбудсман ходимлари томонидан ҳоким ўринбосарига нисбатан маъмурий баённома расмийлаштирилиб, жиноят ишлари бўйича Шаҳрисабз туман судининг 2021 йил 23 февралдаги қарори билан ҳоким ўринбосари маъмурий жазо чораси сифатида такроран жаримага тортилган.
Аввалроқ бизнес-омбудсман қашқадарёлик солиқчиларнинг ноқонуний ҳаракатини фош қилиб, 165 миллион сўм солиқ олиниши керак бўлган қўшма корхонадан 40 миллиард сўм ундирилганини билдирганди.
Изоҳ (0)