Toshkentda Nexia va Matiz ishtirokida sodir bo‘lgan YTH oqibatida ikki kishi halok bo‘ldi

19-aprel kuni Toshkentning Olmazor tumanida sodir bo‘lgan yo‘l-transport hodisasi oqibatida ikki kishi halok bo‘ldi. Bu haqda poytaxt IIBB axborot xizmati xabar berdi.

Ko‘ngilsiz hodisa Beruniy ko‘chasidagi “Tinchlik” metro stansiyasi yaqinida soat 23:30 larda sodir bo‘lgan — 23 yoshli Abdullo Z. boshqaruvidagi Nexia-3 va 25 yoshli Bunyod N. boshqaruvidagi Matiz avariyaga uchragan.

Nexia haydovchisi turli tan jarohati bilan shifoxonada vafot etgan, mashina ichida bo‘lgan 24 yoshli yo‘lovchi ham shifoxonaga yetkazilgan. Matiz haydovchisi esa voqea joyida vafot etgan.

IIBB ma’lumotlarga ko‘ra, avariya Nexia haydovchisining tezlikni me’yoridan oshirgani oqibatida yuzaga kelgan bo‘lishi mumkin. Buning natijasida yengil mashina qarama-qarshi yo‘nalishga chiqib ketib, ikkinchi avtomobilga to‘qnashgan.

Holat yuzasidan Jinoyat kodeksining 266-modda (transport vositalari harakati yoki ulardan foydalanish xavfsizligi qoidalarini buzish) 3-qismi bilan jinoyat ishi qo‘zg‘atilgan. Tergov harakatlari olib borilmoqda.

Avvalroq Sirdaryoda Nexia va ikki yuk mashinasi ishtirokidagi YTH natijasida ikki kishi vafot etgani, Navoiyda Nexia urib yuborgan velosiped haydovchisi shifoxonada vafot etgani, Toshkentda Malibu va Lacetti to‘qnashuvi oqibatida Ozarbayjon fuqarosi vafot etgani hamda Farg‘onada Lacetti yo‘lni kesib o‘tayotgan 12 yoshli velosipedchini urib ketgani haqida xabar berilgandi.