Халқ таълими вазири Шерзод Шерматов Самарқанд вилояти Нуробод туманининг олис ҳудудида йиллар давомида инглиз тили дарси ўтилмаган «қизил» мактабда дарс беришга келган бухоролик эр-хотинга «Халқ таълими аълочиси» кўкрак нишонини топширди. Бу ҳақда вазир ўзининг Facebook’даги саҳифаси орқали маълум қилди.
Вазирнинг ёзишича, 1,5 ставка дарс соати олган, олий ёки биринчи тоифали CEFR’га эга инглиз тили ўқитувчиси олис ҳудуддаги ‘қизил’ мактабда таълим берса, ойлиги 10 миллионга етиши билан бирга, йиллар давомида инглиз тили ўқитувчиси бўлмаган мактаблардаги ўқувчиларнинг келажагига жуда катта ёрдам бўлади.
Нуробод туманининг олис ҳудудида йиллар давомида инглиз тили дарси ўтилмаган ‘қизил’ мактабга бухоролик эр-хотин инглиз тили ўқитувчилари келгани ушбу мактаб ўқувчилари учун таълим сифатини оширишга кўмак беришни бошлаганини гувоҳи бўлиб, уларга миннатдорчилик сифатида ‘Халқ таълими аълочиси’ кўкрак нишонини топшириб келдик. Шундай фидойи ўқитувчиларимиз кўпайса, албатта, таълим сифати паст мактабларда ҳам ижобий ўзгаришлар тезроқ бўлади», — деб ёзади вазир.
Шунингдек, Шерзод Шерматов Нуробод туманининг олис ҳудудларига бориб ишлаётган бошқа қатор, асосан, ёш ўқитувчилар билан ҳам учрашган. Вазирнинг қайд этишича, улар ҳам ўзлари туғилиб ўсган маҳаллаларини ташлаб, Нурободга келиб дарс ўтмоқда. «Тошкент шаҳрининиг Чилонзор туманидан ҳам келган ўқитувчи бор экан. Уларнинг деярли ҳаммаси 1,5 ставкадан дарс соатларига эга бўлишибди. Чунки вакант соатлар анчагина», — дея таъкидлайди халқ таълими вазири.
Шерзод Шерматов янги ташаббус ишлаб кетишига вақт талаб этилиши, шунинг учун биринчилардан бўлиб ўзига қулай шароитни, маҳалласини ташлаб бошқа ҳудудга бориб ишлашга қарор қилган бундай ўқитувчиларга ўз миннатдорчилигини билдирган. Шу билан бирган келгусида шу каби ният қилиб борадиган ўқитувчиларга қўшимча қулайлик яратиш учун «Янги Ўзбекистон Устозлари» лойиҳаси орқали уларни марказлашган равишда ҳужжат топшириши учун имконият яратилиб, мурожаатлар учун телефон ҳам ишга туширилган.
Шерматовнинг таъкидлашича, олис ҳудуддаги мактаб ҳақида тўлиқроқ тасаввур бўлиши учун атрофидаги ҳудудлар расмларини кўриш кифоя. Мактабга Самарқанд шаҳридан деярли 3 соат йўл узоқлигида. Ўқувчилари сони кўпайгани учун мактабга қўшимча бино ва спортзал ҳам қуриш керак, лекин ҳозирги кундаги энг яхши сармоя айнан малакали ўқитувчиларни келиши бўлди, дейди вазир.
Эслатиб ўтамиз, 2019 йилда Вазирлар Маҳкамасининг «Олис ҳудудларда жойлашган умумий ўрта таълим муассасаларида фаолият юритаётган педагог ходимларнинг меҳнатини янада рағбатлантириш тўғрисида»ги қарори қабул қилинган. Унга кўра, умумий ўрта таълим муассасаларида бошқа ҳудудлардан келиб фаолият юритаётган педагог ходимларга махсус устама белгиланган.
Изоҳ (0)