Андижон вилоятининг Жалақудуқ туманида вояга етмаган фарзандлари учун тўланиши лозим бўлган алимент пулини ўз вақтида тўламаган олти нафар ота 15 суткага қамалди. Бу ҳақда «Дарё»га МИБ вилоят бошқармаси ахборот хизмати маълум қилди.
Маълум бўлишича, Фуқаролик ишлари бўйича Хўжаобод туманлараро судининг 2014 йил 25 апрелдаги қарорига асосан қарздор Н.Х. ҳисобидан ундирувчи Г.Б. фойдасига вояга етмаган бир нафар фарзандининг моддий таъминоти учун ойлик топган даромадининг 25 фоизи миқдорида алимент ундириш белгиланган.МИБ Жалақудуқ туман бўлими ходимлари томонидан ижро ҳаракатлари давомида қарздор бир неча маротаба оғзаки ва ёзма равишда огоҳлантирилишига қарамасдан вояга етмаган фарзандини моддий таъминлашдан бўйин товлаган отанинг алиментдан 10 миллион сўм қарздорлиги келиб чиққан.
Шунингдек, Фуқаролик ишлари бўйича Хўжаобод туманлараро судининг 2013 йил 26 сентябрдаги қарорига асосан Б.У. вояга етмаган уч нафар фарзандини моддий таъминлашдан бўйин товлаб, ундирувчилар — М.А.га шу кунга қадар 4 миллион 428 минг, М.Т.га эса 1 миллион 354 минг сўм миқдордаги алимент пулларини тўламаган.
Шу каби ҳолат фуқаро С.Я. томонидан ҳам содир этилган бўлиб, у вояга етмаган икки нафар фарзандини моддий таъминлашдан қасддан бўйин товлаб, жами 9 миллион 558 минг сўм миқдордаги алимент пулларини тўламаган.
Мазкур ҳолатлар бўйича тўпланган иш ҳужжатлари ҳам жиноят ишлари бўйича Жалақудуқ туман судига юборилган бўлиб, суд жараёнида Н.Х., Б.У., С.Я. ва яна уч нафар алиментдан қарздорга Маъмурий жавобгарлик тўғрисидаги кодекснинг 47-4-моддаси (вояга етмаган ёки меҳнатга лаёқатсиз шахсларни моддий таъминлашдан бўйин товлаш) билан 15 сутка қамоқ жазоси тайинланган.
Изоҳ (0)