Xalq ta’limi vaziri Sherzod Shermatov Samarqand viloyati Nurobod tumanining olis hududida yillar davomida ingliz tili darsi o‘tilmagan “qizil” maktabda dars berishga kelgan buxorolik er-xotinga “Xalq ta’limi a’lochisi” ko‘krak nishonini topshirdi. Bu haqda vazir o‘zining Facebook’dagi sahifasi orqali ma’lum qildi.
Vazirning yozishicha, 1,5 stavka dars soati olgan, oliy yoki birinchi toifali CEFR’ga ega ingliz tili o‘qituvchisi olis hududdagi ‘qizil’ maktabda ta’lim bersa, oyligi 10 millionga yetishi bilan birga, yillar davomida ingliz tili o‘qituvchisi bo‘lmagan maktablardagi o‘quvchilarning kelajagiga juda katta yordam bo‘ladi.
Nurobod tumanining olis hududida yillar davomida ingliz tili darsi o‘tilmagan ‘qizil’ maktabga buxorolik er-xotin ingliz tili o‘qituvchilari kelgani ushbu maktab o‘quvchilari uchun ta‘lim sifatini oshirishga ko‘mak berishni boshlaganini guvohi bo‘lib, ularga minnatdorchilik sifatida ‘Xalq ta’limi a’lochisi’ ko‘krak nishonini topshirib keldik. Shunday fidoyi o‘qituvchilarimiz ko‘paysa, albatta, ta’lim sifati past maktablarda ham ijobiy o‘zgarishlar tezroq bo‘ladi”, — deb yozadi vazir.
Shuningdek, Sherzod Shermatov Nurobod tumanining olis hududlariga borib ishlayotgan boshqa qator, asosan, yosh o‘qituvchilar bilan ham uchrashgan. Vazirning qayd etishicha, ular ham o‘zlari tug‘ilib o‘sgan mahallalarini tashlab, Nurobodga kelib dars o‘tmoqda. “Toshkent shahrininig Chilonzor tumanidan ham kelgan o‘qituvchi bor ekan. Ularning deyarli hammasi 1,5 stavkadan dars soatlariga ega bo‘lishibdi. Chunki vakant soatlar anchagina”, — deya ta’kidlaydi xalq ta’limi vaziri.
Sherzod Shermatov yangi tashabbus ishlab ketishiga vaqt talab etilishi, shuning uchun birinchilardan bo‘lib o‘ziga qulay sharoitni, mahallasini tashlab boshqa hududga borib ishlashga qaror qilgan bunday o‘qituvchilarga o‘z minnatdorchiligini bildirgan. Shu bilan birgan kelgusida shu kabi niyat qilib boradigan o‘qituvchilarga qo‘shimcha qulaylik yaratish uchun “Yangi O‘zbekiston Ustozlari” loyihasi orqali ularni markazlashgan ravishda hujjat topshirishi uchun imkoniyat yaratilib, murojaatlar uchun telefon ham ishga tushirilgan.
Shermatovning ta’kidlashicha, olis hududdagi maktab haqida to‘liqroq tasavvur bo‘lishi uchun atrofidagi hududlar rasmlarini ko‘rish kifoya. Maktabga Samarqand shahridan deyarli 3 soat yo‘l uzoqligida. O‘quvchilari soni ko‘paygani uchun maktabga qo‘shimcha bino va sportzal ham qurish kerak, lekin hozirgi kundagi eng yaxshi sarmoya aynan malakali o‘qituvchilarni kelishi bo‘ldi, deydi vazir.
Eslatib o‘tamiz, 2019-yilda Vazirlar Mahkamasining “Olis hududlarda joylashgan umumiy o‘rta ta’lim muassasalarida faoliyat yuritayotgan pedagog xodimlarning mehnatini yanada rag‘batlantirish to‘g‘risida”gi qarori qabul qilingan. Unga ko‘ra, umumiy o‘rta ta’lim muassasalarida boshqa hududlardan kelib faoliyat yuritayotgan pedagog xodimlarga maxsus ustama belgilangan.
Izoh (0)