Тошкент шаҳри Чилонзор туманидаги дорихоналардан бирида кучли таъсир қилувчи дори воситалари сотилаётгани аниқланди, дея хабар бермоқда Бош прокуратура ҳузуридаги Департамент матбуот хизмати.
Маълум қилинишича, Департамент ҳамда ДХХнинг Чилонзор тумани бўлимлари томонидан ўтказилган тезкор тадбирда «С.Л.» МЧЖга қарашли дорихона раҳбари ва сотувчиси кучли таъсир қилувчи 30 дона «Зардекс» дори воситасини 600 минг сўмга сотган вақтида ушланиб, тадбирда дорихонада муомалага киритиш учун сақлаб келинаётган яна 870 дона «Зардекс», 120 дона «Габагамма» ҳамда 111 дона «Тебантин» номли дори воситаси ашёвий далил сифатида олинган.
Мазкур ҳолат юзасидан Жиноят кодексининг 186-3-моддаси (таркибида кучли таъсир қилувчи моддалар мавжуд бўлган дори воситаларини рецепт бўйича чакана реализация қилиш тартибини бузиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Тошкент ва Бўстонлиқ туманларида дори воситаларини ноқонуний равишда қарийб 470 миллион сўмга сотганлар ушлангани, Тошкент вилоятида дори воситаларини жами 34 минг долларга ноқонуний равишда сотаётган шахслар аниқлангани ҳамда Жиззахда магистрал йўл бўйида COVID-19 вирусини аниқловчи тест ва бошқа тиббий буюмларни ноқонуний сотаётган шахс ушлангани ҳақида хабар берилганди.
Изоҳ (0)