Самарқандда Ҳажга қорадори олиб бораётганда қўлга тушган фуқарога нисбатан қўлланилган жазони енгил турига ўзгартириб, озодликка чиқариб беришни ваъда қилган ва хизмати учун 50 минг доллар олган адвокат ишини суд кўриб чиқишни бошлади. Бу ҳақда «Дарё»га вилоят прокуратураси ахборот хизмати маълум қилди.
2017 йилнинг 11 август куни Самарқанд халқаро аэропортида Ҳажга кетаётган самарқандлик Ш.А.нинг багажларидаги қуритилган нон бўлакларида 72 грамм опий борлиги аниқланганди. Шундан сўнг Жиноят ишлари бўйича Ургут туман судининг 2018 йил 13 февралдаги ҳукми билан Ш.А. Жиноят кодексининг 276-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) 2-қисми «а» банди, 246-моддаси (контрабанда) 2-қисми билан айбли деб топилиб, 12 йил муддатга озодликдан маҳрум қилинган.Ш.А.нинг куёви Ш.Ҳ. ҳуқуқни муҳофаза қилувчи органларга мурожаат қилиб, 2018 йилнинг сентябрь ойида «Самарқанд қонун устуворлиги» адвокатлар ҳайъати хизмат хонасида ўша даврда ушбу ҳайъатда адвокат бўлган, ҳозирги вақтда Тошкент шаҳар «Шуҳрат-ҳимоя» адвокатлик фирмаси адвокати М.Ш. Ш.А.нинг жазосини бошқа енгил турдаги жазога ўзгартириб, озодликка чиқариб беришни ваъда қилиб, унинг яқинларидан 50 минг долларни фирибгарлик йўли билан қўлга киритганлигини маълум қилган.
Аризада жабрланувчи фирибгарлик йўли билан пул маблағларини қўлга киритган адвокатга нисбатан қонуний чора кўришни ва етказилган моддий зарарни ундиришни сўраган.
Мазкур ҳолат юзасидан 2020 йилнинг 1 декабрь куни вилоят прокурори Равшан Машарипов томонидан адвокатга нисбатан Жиноят кодексининг 168-моддаси (фирибгарлик) 4-қисми «а» банди ва 28, 211-моддаси (пора бериш) 3-қисми «а» банди билан жиноят иши қўзғатилган.
Жиноят иши бўйича Самарқанд шаҳар прокуратураси томонидан дастлабки тергов ҳаракатлари ўтказилган. 2021 йилнинг 1 март куни адвокат М.Ш. Жиноят кодексининг 168-моддаси 4-қисми «а» банди ва 28, 211-моддаси 3-қисми «а» банди билан айбланувчи тариқасида жалб этилган. Унга нисбатан гаров эҳтиёт чораси қўлланилган. Жиноят иши бўйича айблов хулосаси прокурор томонидан тасдиқланиб, Жиноят-процессуал кодексининг 388-моддаси тартибида кўриб чиқишлик учун жиноят ишлари бўйича Самарқанд шаҳар судига юборилган.
Изоҳ (0)