Mercedes-Benz компанияси ўзининг премиум синфига кирувчи EQS электроседанини тақдим этди

Mercedes-Benz компанияси ўзининг EQS люкс электроседанини тақдим этди. Янги модель анъанавий ички ёнув двигателига эга S-Class седани ўрнини эгаллаши кутилмоқда, деб хабар беради «Afisha.uz».

Mercedes-Benz EQS 2019 йили шу ном остида тақдим этилган концепт дизайнининг кўплаб жиҳатларини ўзида мужассам этган. Электрокар ташқи кўриниши олд томондан қаршилик коэффициентини камайтириш ҳисобига лойиҳаланган — Mercedes муҳандислари тарихда биринчи бор 0,20 кўрсаткичга эришган. Бу янги модель камроқ энергия сарфлашига ёрдам беради.

EQS салони компаниянинг сўнгги концепт-карлари услубидаги футуристик дизайнга эга бўлган. Унда диагонали 56 дюймга тенг МBUХ Hyperscreen мултимедиа тизими жойлашган. Тизим қурилмалар панели ва олд йўловчи учун 12,3 дюймли экранни, шунингдек, 17 дюймли марказий сенсор экранни ўз ичига олади.

Пемиум седан капоти остига Mercedes муҳандислари 331 от кучини тақдим этишга қодир двигатель ўрнатган. Бу каби электродвигатель соатига 100 километр тезликка 6,2 сонияда эришишга қодир. Шунингдек, моделнинг 524 от кучига эга версияси ҳам сотувга чиқади — у соатига 100 километр тезликка 4,3 сонияда эришади.

Бундан ташқари, немис автоконцерни седаннинг қуввати 725 от кучига эга AMG-версияси устида ҳам иш олиб бормоқда. Барча версияларда машинанинг орқа ғилдираги шаҳар йўлларидаги бурилишларда манёврчанликни ошириш учун 4,5 даражага бурила олади. Шу сабабли 5 метрли EQS’нинг қайрилиб олиши учун 10,5 метрли диаметр кифоя қилади.

Mercedes’дагиларнинг маълум қилишича, янги седанга унинг жамланмасидан келиб чиқиб 350 тагача турли датчик ва сенсорлар ўрнатилади. Уларнинг барчаси автопилот ва «ақлли» функцияларга жавоб беради. Масалан, Mercedes-Benz EQS ўз эгаси олдига келаётганида автоматик равишда эшик тутқичини чиқаради ва ҳайдовчи яқинлашганда эшикни бироз очади.

Қўшимча ҳақ эвазига Drive Pilot ярим автомат бошқарув тизимидан ҳам фойдаланиш мумкин. Бироқ у фақатгина соатига 60 километргача бўлган тезликда ҳамда Германиянинг айрим автомагистралларида ишлайди.

Тақдимот давомида автомобиль нархига тўхталиб ўтилмаган, бироқ таъкидланишича, машина 2021 йилнинг кузида сотувга чиқади.

Эслатиб ўтамиз, 2020 йилнинг июлида Mercedes-AMG GT Black Series суперкари, ноябрда эса ҳашаматли Mercedes S-Class седани тақдим этилганди.