Иқтисодий тадқиқотлар ва ислоҳотлар маркази Ўзбекистонда кўчмас мулк ва автомобиль савдоси бўйича статистика маълумотларини эълон қилди.
Келтирилган маълумотларга кўра, март ойида Ўзбекистонда кўчмас мулк бўйича расмийлаштирилган шартномалар сони февраль ойи билан таққослаганда ўзгаришсиз қолди ва 20,2 минг донани ташкил қилди. Бу 2020 йилнинг март ойига нисбатан 34,4 фоизга кўпроқ ҳисобланади.
Март ойида мамлакат автомобиль бозорида аҳоли талаби февраль ойига нисбатан 7,7 фоизга ошиб, қаторасига иккинчи ой барқарор ўсиш суръатларини кўрсатди. 2020 йил март ойи билан таққослаганда автомобиллар савдоси ўсиши 47,4 фоизни ташкил қилди.
Таъкидланишича, 2020 йил март ойида республика бўйича жорий этилган карантин чекловлари натижасида савдолар февраль ойига нисбатан 34,6 фоизга камайган эди.
Ҳисобот даврида Қорақалпоғистон (31,5 фоиз), Хоразм (30,5 фоиз), Жиззах (23,5 фоиз) вилоятларида рўйхатга ва қайта рўйхатга олинган автомобиллар сони юқори суръатларда ўсди.
Шунингдек, Бухоро (7,9 фоиз), Қашқадарё (7 фоиз) ва Андижон (4,3 фоиз) вилоятларида сезиларли даражада камайиш кузатилди.
Бундан аввал Ўзбекистонда инфляция даражаси кетма-кет уч ойдан буён 1 фоиздан ошмаяпгани, Ўзбекистондаги қайси ҳудуд аҳолисида автотранспорт воситалари кўплиги маълум бўлгани ҳамда Ўзбекистонга январь–февраль ойларида қанча электромобил олиб келингани ҳақида хабар берилганди.
Изоҳ (0)