Geely компанияси тезлик, об-ҳаво ва тирбандликлар ҳақида маълумот берувчи голографик тасвирни яратишга хизмат қиладиган Aerial Intelligent Displey («Ақлли ҳаво дисплейи») тизимини тақдим этди. Бундан ташқари, АID қўшиқ айтиб, рақсга туша оладиган уч ўлчамли ёрдамчи-аватарга ҳам эга, деб хабар беради Motor.
Prism Entertainment билан ҳамкорликда яратилган Geely’нинг янги тизими турли ракурслардан ва ёритилган муҳитда ҳам кўриш мумкин бўлган уч ўлчамли рангли тасвирларни ҳосил қилади. Проекцион дисплейлардан фарқли ўлароқ, АID бирор юзага муҳтож эмас ва 3D тасвирни тўғри ҳавога «чизади». Одатдаги дисплейлар машинанинг олд ойнасидан фойдаланади, бироқ улар икки ўлчамли тасвирдир.
Маълумотларга кўра, АID’нинг голографик тасвирини ҳар бир дюймли 352 пикселдан иборат бўлиб, унинг «доналарини» 20 сантиметр яқинликдан пайқаш мумкин, холос. Тасвир ёрқинлиги 10 минг нит бўлиб, бу замонавий экранлардан 4-10 баробарга кўп демак.
Ташқи кўринишини созлаш мумкин бўлган голографик ассистeнт ҳайдовчи билан янги даражада «мулоқот» қила олади: об-ҳаво, ҳаракат тезлиги, ҳаракатланиш режими ва навигатор маълумотларини кўрсатади, шунингдек, хавф-хатардан огоҳлантиради. Шунингдек, у чатлардаги хабарларни ўқиши, рақсга тушиб, қўшиқ айтиши мумкин.
Бу каби инновацион дисплей биринчи бўлиб Geely’нинг Icon кроссоверига ўрнатилади. Хитой компанияси келажакда ушбу технологияни бошқа моделларга ҳам жорий этишни режалаштирган.
Эслатиб ўтамиз, 2020 йилда Geely компанияси Volvo билан ҳамкорликда Icon кроссоверини ишлаб чиқаришни йўлга қўйган эди. Ушбу модель IAPS махсус иқлим қурилмаси билан жиҳозланган бўлиб, у салон ичидаги инсонни бактерия ва вируслардан ҳимоя қилишга қодир.
Изоҳ (0)