Россияда ҳибсга олинган гумонланувчилар — беларуслик сиёсатшунос Александр Федута, мамлакатдаги мухолиф партия етакчиси Григорий Костусев ва АҚШда яшовчи адвокат Юрий Зенкович Александр Лукашенко ҳамда унинг оила аъзоларига суиқасд уюштиришга уринган. Бу ҳақда Лукашенконинг ўзи маълум қилган, деб ёзмоқда Meduza.
Беларусь президентининг сўзларига кўра, мазкур ҳаракатларга тайёргарлик ортида АҚШ махсус хизматлари турган.
«Бу ишга хориждаги махсус кучлар – катта эҳтимол билан, Марказий разведка идораси, Федерал қидирув бюроси ва АҚШнинг яна бошқа хизматлари аралашган деб ўйлаяпман. Биз уларнинг Минскка келиб, президент ва унинг фарзандларига қарши суиқасд уюштириш ниятида бўлганлигини аниқладик», – деган Лукашенко.
«Бироқ мени америкаликларнинг нима учун ўзларини бундай тутаётгани ҳайрон қолдирди. Чунки, менимча, президентни йўқ қилиш вазифасини мамлакатдаги энг юқори сиёсий раҳбарият топшириқ сифатида бериши мумкин», — дея таъкидлаган Лукашенко Беларусь президенти матбуот хизмати эълон қилган видеода.
Мавзуга доир: Лукашенко тез орада нафақага чиқишини айтди
Россия ФХБ Беларусь ДХҚнинг маълумотларини тасдиқлаган ва Федута ҳамда Зенковични Москвада ҳибсга олиш операцияси ўзаро ҳамкорликда амалга оширилганини маълум қилган. ФХБ маълумотларига кўра, улар шаҳарга АҚШ ҳамда Польшадаги маслаҳатлашувлардан кейин Беларусь қуролли кучларининг мухолифат томонга ўтган генераллари билан учрашиш учун келган. ФХБ ахборотида тўнтариш ёзда эмас, 9 майда бўлиб ўтиши режа қилинганлиги аниқлангани айтилган.
Александр Федута 1990 йилларда Александр Лукашенконинг матбуот котиби бўлган, 2005 йилда унинг энг биринчи сиёсий таржимаи ҳолининг муаллифи ҳисобланади. Кейинчалик Федута мухолифат томонига ўтиб кетган.
Зенкович 2000 йиллар бошида «Беларусь халқ фронти» мухолифат партиясининг аъзоси бўлган, кейинчалик юристлик фаолиятини олиб бориш учун АҚШга кетган. Беларусь фуқаролигидан ташқари АҚШ фуқаролигига ҳам эга.
2021 йил март ойида Зенкович Facebook’да беларусларни Александр Лукашенкога қарши «ўз-ўзини ҳимоя қилиш гуруҳлари»ни тузишга чақирганди. Шунингдек, у Светлана Тихановскаяни Беларусь ҳукумати билан музокара олиб боришга уринаётгани учун танқид қилган.
Эслатиб ўтамиз, Беларусь давлат хавфсизлик қўмитаси апрель бошида мухолифат етакчиси Светлана Тихановскаяни террорчиларга алоқадор одамлар рўйхатига киритганди.
Изоҳ (0)