Ижтимоий тармоқларда Санкт-Петербургдаги «Сибур Арена» футбол стадиони яқинида жойлашган автотураргоҳда BMW ҳайдовчиси дрифт уюштириб, машинасини ёқиб юборгани тасвирланган видео тарқалди, деб хабар беради Motor.
Кўнгилсиз ҳодиса тасвирланган видео стадион яқинида жойлашган кузатув камералари томонидан ёзиб олинган. Кадрлардан кўриш мумкинки, қора BMW автотураргоҳда дрифт қилмоқда. Шу вақт автомобиль капоти остидан тутун чиқиб, немис моделининг мотор бўлмаси аланга олган.
Ёнғин нима сабабдан юзага келгани ҳозирча номаълум. BMW ҳайдовчиси ва унинг ичида бўлган йўловчи оловни ўт ўчиргич билан мустақил бартараф этишга уринган, бироқ уларнинг ҳаракати бесамар кетган. Орадан бироз ўтгач, воқеа жойига ўт ўчирувчилар етиб келган ва бир неча дақиқа ичида оловни ўчирган. Аммо бу вақтга келиб спорткар деярли бутунлай ёниб бўлган.
Омадсиз дрифт оқибатида BMW ҳайдовчиси ва йўловчига ҳеч қандай жароҳат етмаган. Спорткар эса қайта тикланишга яроқсиз ҳолга келиб қолган.
Аввалроқ Австралияда «покришка»ни қиздирмоқчи бўлган эркак ўзининг Mercedes-AMG’сини ёқиб юборганди.
Изоҳ (0)