Ижтимоий тармоқларда автобус йўл четида турган пиёдани уриб кетгани акс этган видео тарқалди. Ҳолат юзасидан «Тошшаҳартрансхизмат» маълумот берди.
Маълум қилинишича, 2021 йилнинг 11 апрель куни соат 14:50 атрофида 41-сонли йўналишда ҳаракатланувчи ҳайдовчи автобусни Бунёдкор кўчаси бўйлаб бошқариб бораётган вақтда Навоий, Самарқанд, Бухоро вилоятларига қатновчи таксиларнинг автотураргоҳи қаршисида йўл четида турган пиёдани уриб юборган.
Мазкур ҳолат юзасидан «Тошшаҳартрансхизмат» акциядорлик жамиятининг «Йўловчи транспортида ҳаракат хавфсизлигини назорат этиш бошқармаси» ходимлари томонидан тезкор суриштирув ишлари ўтказилди.
Суриштирув натижасида мазкур автобус 7-автобус саройи тасарруфидаги, сарой рақами 200 бўлган, 41-сонли йўналишда ҳаракатланувчи Isuzu LE 60 русумли автобус ҳайдовчиси М.М эканлиги аниқланди.
Дастлабки маълумотларга кўра, жабрланувчи пиёда йўл-транспорт ҳодисаси оқибатида тан жароҳати олган ва Республика шошилинч тез ёрдам илмий марказига етказилиб, тез тиббий ёрдам кўрсатилган. Айни пайтда жабрланувчи пиёданинг аҳволи қониқарли эканлиги айтилмоқда.
Ҳозирда ушбу ҳуқуқбузарликни амалга оширган автобус ҳайдовчиси М.М.га нисбатан жиноий иш очилиб, тергов ҳаракатлари олиб борилмоқда.
Бундан аввал Тошкентда Nexia автобусга урилиб, уни ағдариб юборгани, Тошкентда таровиҳ намози муносабати билан ҳар Рамазон оқшомида қатор автобуслар йўналиши ўзгариши маълум қилингани, Тошкент метросида поезд очиқ эшик билан ҳаракатлангани ортидан 3 киши ишдан олингани ҳақида хабар қилинганди.
Изоҳ (0)