«Метрополитен» санъат музейи дунёдаги энг йирик музейлардан бири бўлиб, ташриф буюрувчилар сони бўйича рейтингларда тўртинчи ўринни эгаллайди. 2018 йилдан бери музейга бепул кириш ҳуқуқи фақат у жойлашган ҳудуд аҳолиси – нью-йоркликлар учун сақланиб қолган, қолган ташриф буюрувчилар учун 25 долларлик бадал жорий қилинган. «Дарё» бугун сизни ушбу музей билан таништиради.
Музейга 1870 йилда асос солинган. 2013 йилги маълумотларга кўра, музейнинг йиллик ташриф буюрувчилари сони 6 226 727 тани ташкил этади. Музей директори Макс Холляйндир.
Музей тарихи
Музей 1870 йилнинг 13 апрелида бир гуруҳ америкалик ишбилармонлар ва санъат ихлосмандлари томонидан ташкил этилди ва биринчи марта 1872 йил 20 февралда жамоатчиликка очилди. Унинг биринчи президенти Жон Тэйлор Жонсон, ижрочи директори эса Жорж Палмер Путнем эди. Илк кириш чипталари турли рангдаги кичкина думалоқ нишонлар бўлиб, ҳар бир ҳафта кунининг нишони турлича рангланган. Уларни уст кийимларига ёпиштириш ёки эсдалик сифатида олиб қолиш мумкин эди. 2014 йилда музей металл нишончалардан фойдаланишни тўхтатди ва стикерларга ўтди.
Музей 1880 йилда америкалик меъморлар Калверт Вокс ва Жейкоб Молдлар томонидан бозар услубида қурилган.
Музей коллекцияси
Музей учта шахсий коллекция – 174 та санъат асари, шу жумладан, Халс, Ван Дейк, Теполо ва Пуссеннинг ишларига асосланган. Музей коллекцияси жуда тез ўсди. Жон Кенсетт вафотидан сўнг унинг шахсий коллекциясидаги 38 та расм музей тасарруфига ўтди. Аммо фақат ХХ асрга келибгина музей дунё миқёсида шуҳрат қозонди. 1907 йилда музей Огюст Ренуардан ўзининг биринчи расмини сотиб олди.Бугунги кунда «Метрополитен» ўзининг импрессионистик ва пост-импрессионистик тўпламлари билан фахрланади. Музейнинг доимий тўпламда икки миллиондан ортиқ тасвирий асарлар мавжуд. Унда жуда катта гравюралар тўплами бор. Фотосуратларнинг катта тўпламлари орасида Уолкер Эванс, Диана Арбус, Алфред Стиглитз ва бошқаларнинг ишлари бор.
2013 йил апрель ойида коллекционер Леонард Лаудер ўзининг кубизм йўналишига мансуб 78 асардан иборат тўпламини музейга совға қилди, ундаги 33 асар Пикассога тегишли эди.
Ҳар йили музейнинг янги харидларни ўзида акс эттирувчи «Йиллик ҳисобот» нашр этилади. 2017 йил февраль ойида музей ўз коллекциясидан 375000 та рақамланган санъат асарини оммага тақдим этди. Ушбу расм ва фотосуратларни шахсий ва тижорат мақсадларида эркин ишлатиш мумкин. Бундан ташқари, уларни таҳрирлаш ва янги композициялар таркибида ишлатиш мумкин.
Костюм институти
Костюм институти ўзининг ҳар йили Нью-Йоркда бўлиб ўтадиган Мет Гала шоуси билан машҳур.Костюм санъати музейи Эйлин Бернстайн ва Айрин Левисон томонидан ташкил этилган. 1937 йилда у «Метрополитен» санъат музейининг таркибига кирди ва ўз номини Костюм институтига ўзгартирди. Бугунги кунда унинг коллекциясида 35000 дан ортиқ костюм ва аксессуар мавжуд. Институт илгари музей биносининг пастки қисмида жойлашган «Пойдевор» лақабли галереяга эга эди.
Музейда Vogue журналининг бош муҳаррири Анна Винтур бошчилигидаги ҳар йили ўтказиладиган Мет Гала кўргазмаси мода оламидаги ниҳоятда оммабоп ҳодисага айланди. Таъкидлаш жоизки, 2007 йилда кўргазмага кириш учун чиқарилган 700 та чиптанинг ҳар бирининг бошланғич нархи 6500 АҚШ долларини ташкил этган. Ҳар бир кўргазма модани ижтимоий қадриятларнинг кўзгуси сифатида намойиш этади ва тарихий услубларни, уларнинг бугунги модага қараб эволюциясини кўрсатиб беради.
2014 йил 14 январдан бошлаб Костюм институти мажмуаси Анна Винтур номи билан атала бошланди. Институт куратори Эндрю Болтон ҳисобланади.
Қурол-аслаҳалар бўлими
Музейнинг энг кенг бўлимларидан бири турли даврлар ва маданиятларда қўлланилган қурол-аслаҳаларга бағишланган. Ушбу коллекциянинг илк экспонатлари 1881 йилда сотиб олинган. 1904 йилда музей Европа ва япон қурол-яроғларининг иккита йирик коллекциясини сотиб олди ва бу коллекциялар тез орада халқаро миқёсда машҳурликка эришди.Экспонатлар орасида XV-ХВИ асрларга оид Эрон ва Онадўлидан келган қурол-аслаҳалар, шунингдек, Усмонлилар империяси ва мўғуллар давлатининг марваридлари билан безатилган қуроллар мавжуд. Тўплам ҳажми қарийб 14 минг дона экспонатни ташкил этади, улар орасида ҳукмдорлар томонидан ишлатилган кўплаб аслаҳалар, шу жумладан, Англия қироли Генрих VIII, Франция қироли Генрих II ва император Фердинанд I нинг зирҳлари ҳам бор.
Музей бўлимлари
Ҳозирги кунда «Метрополитен»да қуйидаги бўлимлар мавжуд:- Америка декоратив санъати бўлими;
- Америка рассомлиги ва ҳайкалтарошлиги бўлими;
- Қадимги Ўрта Шарқ санъати бўлими;
- Қурол-аслаҳалар бўлими;
- Африка, Океания ва Америка санъати бўлими;
- Осиё санъати бўлими;
- Ўрта аср галереяси бўлими;
- Костюм институти;
- Чизмалар ва литографиялар бўлими;
- Қадимги Миср санъати бўлими;
- Европа рассомчилиги бўлими;
- Европа ҳайкалтарошлиги ва декоратив санъати бўлими;
- Қадимги юнон ва Рим санъати бўлими;
- Ислом санъати бўлими;
- Роберт Леман тўплами;
- Кутубхоналар;
- Ўрта аср санъати бўлими;
- Замонавий санъат бўлими;
- Мусиқий асбоблар бўлими;
- Фотосуратлар бўлими.
Дилбар Исматуллаева тайёрлади.
Изоҳ (0)