Канада ҳукумати Тоғли Қорабоғдаги можарода мамлакатнинг баъзи мудофаа технологияларидан фойдаланилгани учун Туркияга қурол экспортини тақиқлаб қўйди. Бу ҳақда Канада ташқи ишлар вазири Марк Гарнога таяниб «Korrespondent.net» хабар берди.
Фото: EPA
Унинг таъкидлашича, 2020 йилнинг кузида, Канаданинг экспорт назорати тартибига мувофиқ, Тоғли Қорабоғдаги можароларнинг авж олишида Озарбайжон томонидан Канада технологиясидан фойдаланилгани ҳақидаги даъволар бўйича тергов натижалари чиқмагунча, Канада ҳукумати ҳарбий маҳсулотларни ва технологияларни Туркияга экспорт қилишни вақтинча тўхтатган эди.
«Канаданинг Туркияга экспорт қилинган технологиялари Тоғли Қорабоғда ишлатилгани тўғрисида аниқ далиллар топилган ушбу таҳлилдан кейин бугун мен 2020 йилнинг кузида вақтинча тўхтатилган рухсатномаларнинг бутунлай бекор қилинганини эълон қиламан», — деди Гарно ўзининг баёнотида.
Унинг сўзларига кўра, Анқаранинг ҳаракатлари «Канаданинг ташқи сиёсати ва Туркиянинг якуний фойдаланиш кафолатларига тўғри келмайди».
Шу билан бирга, Гарнонинг таъкидлашича, «Туркия НАТОнинг муҳим иттифоқчиси ҳисобланади, НАТОнинг ҳамкорлик дастурлари билан боғлиқ аризалар алоҳида кўриб чиқилади».
Аввалроқ Россия президенти Владимир Путин ва Озарбайжон президенти Илҳом Алиев телефон орқали гаплашиб, Тоғли Қорабоғ атрофидаги вазиятни муҳокама қилгани ҳақида хабар берилди. Давлат раҳбарлари минтақада тинчлик, хавфсизлик ва ижтимоий-иқтисодий ривожланишни таъминлаш масалаларини кўриб чиқди, шунингдек, транспорт коммуникациясини қайта тиклашни муҳокама қилди.
Туркия президенти Ражаб Тоййиб Эрдўғон эса Рамазондан кейин (май ойида) Тоғли Қорабоғдаги Шуша шаҳрига ташриф буюриш нияти борлигини маълум қилди. Таъкидланишича, Эрдўғон Шушага Озарбайжон президенти Илҳом Алиев билан бирга келиш ниятидалигини билдирган.
