Kanada hukumati Tog‘li Qorabog‘dagi mojaroda mamlakatning ba’zi mudofaa texnologiyalaridan foydalanilgani uchun Turkiyaga qurol eksportini taqiqlab qo‘ydi. Bu haqda Kanada tashqi ishlar vaziri Mark Garnoga tayanib “Korrespondent.net” xabar berdi.
Uning ta’kidlashicha, 2020-yilning kuzida, Kanadaning eksport nazorati tartibiga muvofiq, Tog‘li Qorabog‘dagi mojarolarning avj olishida Ozarbayjon tomonidan Kanada texnologiyasidan foydalanilgani haqidagi da’volar bo‘yicha tergov natijalari chiqmaguncha, Kanada hukumati harbiy mahsulotlarni va texnologiyalarni Turkiyaga eksport qilishni vaqtincha to‘xtatgan edi.
“Kanadaning Turkiyaga eksport qilingan texnologiyalari Tog‘li Qorabog‘da ishlatilgani to‘g‘risida aniq dalillar topilgan ushbu tahlildan keyin bugun men 2020-yilning kuzida vaqtincha to‘xtatilgan ruxsatnomalarning butunlay bekor qilinganini e’lon qilaman”, — dedi Garno o‘zining bayonotida.
Uning so‘zlariga ko‘ra, Anqaraning harakatlari “Kanadaning tashqi siyosati va Turkiyaning yakuniy foydalanish kafolatlariga to‘g‘ri kelmaydi”.
Shu bilan birga, Garnoning ta’kidlashicha, “Turkiya NATOning muhim ittifoqchisi hisoblanadi, NATOning hamkorlik dasturlari bilan bog‘liq arizalar alohida ko‘rib chiqiladi”.
Avvalroq Rossiya prezidenti Vladimir Putin va Ozarbayjon prezidenti Ilhom Aliyev telefon orqali gaplashib, Tog‘li Qorabog‘ atrofidagi vaziyatni muhokama qilgani haqida xabar berildi. Davlat rahbarlari mintaqada tinchlik, xavfsizlik va ijtimoiy-iqtisodiy rivojlanishni ta’minlash masalalarini ko‘rib chiqdi, shuningdek, transport kommunikatsiyasini qayta tiklashni muhokama qildi.
Turkiya prezidenti Rajab Toyyib Erdo‘g‘on esa Ramazondan keyin (may oyida) Tog‘li Qorabog‘dagi Shusha shahriga tashrif buyurish niyati borligini ma’lum qildi. Ta’kidlanishicha, Erdo‘g‘on Shushaga Ozarbayjon prezidenti Ilhom Aliyev bilan birga kelish niyatidaligini bildirgan.
Izoh (0)