ЎФА тартиб интизом-қўмитаси «Навбаҳор»—«Пахтакор» учрашувидаги ҳолатлар бўйича қарор чиқарди. «Навбаҳор» 2 та уй ўйинини томошабинларсиз ўтказади

Ўзбекистон футбол ассоциацияси (ЎФА) тартиб-интизом қўмитасининг йиғилиши бўлиб ўтди. Унда Суперлига 5-тури доирасидаги «Навбаҳор» — «Пахтакор» учрашувида юзага келган тартибсизликлар масаласи кўриб чиқилди.

Унга кўра, учрашув вақтида «Навбаҳор» мухлислари ҳакамни ва рақиб футболчиларини ҳақоратлагани, ўйинда сўн эса тартибсизликлар келтириб чиқаргани учун наманганликлар клуби иккита уй учрашувини мухлисларсиз ўтказадиган бўлди.

Қўмитага тақдим этилган маълумотлар, далиллар ҳамда видео-ёзувлар натижасида учрашув давомида ҳар икки жамоанинг айрим расмий шахслари техник зонани бир неча маротаба тарк этиб, бош ҳакамга қўпол тарзда эътироз билдиргани, учрашувнинг 90-дақиқасида бош ҳакам VAR мониторидан фойдаланиши вақтида унинг иш фаолиятига халал берилгани аниқланди. Қолаверса, учрашувнинг сўнгида «Навбаҳор» футбол клуби мухлислари учрашув расмий шахсларини номаъқул сўзлар билан ҳақорат қилгани, шунингдек, улар томонидан майдонга турли буюмлар улоқтирилгани, ЎзМТРКга тегишли кўчма телевизион станцияга ҳужум қилингани ва унга жиддий зарар етказилгани маълум бўлди.

Мавжуд далиллар ва кўрсатмалар атрофлича ўрганиб чиқилиб, «Навбаҳор» — «Пахтакор» учрашуви вақтида «Навбаҳор» футбол клуби ишқибозларини мухлислик маданиятидан четга чиқиб, стадионга турли буюмларни улоқтиргани, стадион ва унга ёндош ҳудудларда тартибсизликлар келтириб чиқаргани, жамоа расмий шахслари томонидан стадионда тартибсизликлар келиб чиқишига сабаб бўлган ножўя хатти-ҳаракатлар содир этилгани сабабли ЎФА интизом кодексининг 5.4 ва 5.9-бандларига мувофиқ «Навбаҳор» футбол клубига нисбатан навбатдаги иккита уй учрашувини томошабинларсиз ўтказиш интизом чораси қўлланилди.

Шунингдек, «Навбаҳор лочинлари» футбол клуби Техник директори Мустафо Байрамов, дарвозабонлар мураббийи Павел Синелников стадионда тартибсизликлар келиб чиқишига сабаб бўлган ножўя хатти-ҳаракатлар содир этгани, жамоа маъмури Абдурауф Ғуломов учрашув якунида рақиб жамоа футболчилари майдонни тарк этаётган вақтда нопрофессионал тарзда уларни жуда қўпол сўзлар билан ҳақорат қилгани учун уларга нисбатан футбол клуби томонидан ички интизом чорасини қўллаш тўғрисида «Навбаҳор» клубига ёзма тақдимнома киритилди.

Ўз ўрнида, учрашув вақтида «Пахтакор» футбол клуби расмий шахслари томонидан техник зонани бир неча бор тарк этиб, стадионда тартибсизликлар келиб чиқишига сабаб бўлган ножўя хатти-ҳаракатлари содир этилгани, жамоа расмийлари ва айрим футболчилари учрашув бош ҳакамини бир неча марта номаъқул сўзлар билан ҳақорат қилгани учун «Пахтакор» футбол клубига нисбатан ЎФА интизом кодексининг 5.4-бандига мувофиқ жарима интизом чораси қўлланилди.

ЎФА баёноти

Маълумот учун, ўйин якунланиб бораётган бир вақтда учрашув бош ҳаками Фирдавс Норсафаров видеотакрорлардан кейин «Навбаҳор» дарвозаси томон пенальти белгилади. 11 метрлик жарима зарбасини Драган Черан голга айлантирди ва бу орқали «Пахтакор»нинг ғалабасини таъминлади. Ҳакамнинг бу қарори стадионга йиғилган наманганлик мухлисларни жунбишга келтирди.

Томошабинлар ўйин якунлангач ҳакам ва «Пахтакор» футболчилар томон турли буюмларни улоқтирди. Бундан ташқари стадион атрофида минглаб ишқибозлар тўпланиб, ўз норозилигини намойиш қилди.

Кейинчалик Наманган вилояти ИИБ ушбу ўйиндан кейин ҳакамлар ва «Пахтакор» вакиллари Наманган шаҳридан кузатиб қўйилгани ва тартибсизликларда қатнашган етти нафар фуқаро жавобгарликка тортилгани ҳақида маълум қилди.