Етарлича машҳурликка эришгани, ижроси билан мухлислар қалбидан жой олиб улгурганига қарамай, «Оскар» мукофотига лойиқ кўрилмаган юлдузлар ҳақида маълумот бериб ўтамиз.
Женнифер Энистон
1994 йил экран юзини кўрган «Дўстлар» фильмининг муваффақиятига қарамай, Энистонга на «Грэмми» на «Олтин Глобус» мукофоти берилган. «Оскар» ҳақида-ку гапирмаса ҳам бўлаверади. Карьераси давомида бошқа бир қанча муваффақиятли лойиҳаларда иштирок этса ҳамки, актриса Америка киноакадемияси аъзоларининг эътиборини торта олмаган. Женнифер омад ва муваффақият мукофот билан боғлиқ эмас, деб ҳисоблайди.
Жим Керри
«Ниқоб», «Мен, яна мен ва Ирен», сингари фильмлар юлдузи маҳоратининг таърифига ҳожат йўқ. Шунга қарамай, кўп йиллик карьераси давомида актёрнинг бир марта ҳам «Оскар»га номзоди қўйилмаган. Унинг арсеналида фақатгина «Олтин Глобус» ва МТV Movie Awards мукофотлари бор.
Кемерон Диаз
Жим билан бирга «Ниқоб» фильмида бирга суратга тушган Кемерон ҳам актёр сингари бир марта ҳам «Оскар»га лойиқ кўрилмаган. Фаолиятини моделликдан бошлаган Кемерон «Ниқоб»нинг премьерасидан кейин машҳурликка эришган. «Оскар»нинг йўқлиги уни ҳеч ҳам ташвишга солмайди, у ҳаётда бундан ҳам муҳимроқ нарсалар бор деб ҳисоблайди. «Мен ўз касбимни яхши кўраман ва қилаётган ишларимни қандайдир мукофотни олиш учун бажармайман», — дейди актриса.
Жонни Депп
Уч карра номзоди қўйилганига қарамай, Голливуд юлдузи бир маротаба ҳам «Оскар»ни қўлга киритмаган. «Кариб денгизи қароқчилари: Қора марварид тавқи лаънати» фильми сабаб илк бор 2004 йилда номзод бўлган, аммо мукофот Шон Пенга насиб қилган. Депп бугунги кунда «Олтин глобус» ва «SAG Award» мукофоти билан мақтаниши мумкин.
Шерон Стоун
90 йилларда машҳурликка эришган актриса «Асосий инстинкт» фильмидаги роли унга ҳақиқий муваффақият олиб келган. Аммо шунга қарамай, киноакадемиядагилар унга эътибор қаратмаган. 1996 йилда «Казино» фильмидаги роли учун энг яхши актриса сифатида «Оскар»га номзоди қўйилган, аммо мукофот унга насиб қилмаган.
Киану Ривз
«Матрица» фильмида бош қаҳрамонни гавдалантирган Ривзнинг ижроси бир қанча мукофотлар, хусусан, «МТV каналининг киномукофоти»га лойиқ кўрилган. Аммо «Оскар»га эмас. Актёр учун бу мукофотлар тугул, юлдузлик ҳам муҳим моҳиятга эга эмас. У камтар ва оддийлиги билан шоу-бизнеснинг бошқа вакилларидан ажралиб туради.
Скарлетт Йоханссон
10 ёшидан суратга тушишни бошлаган актриса карьераси давомида бир қанча эсда қоларли ролларни ижро қилган. «Қора бева» фильмидаги Наташа Романофф сўнгги омадли ижроларидан бири ҳисобланадиган актриса, 2020 йилда «Никоҳ ҳақидаги ҳикоя» фильми учун энг яхши актриса, «Қуёнча Жожо» сабаб эса иккинчи даражали энг яхши актриса йўналишларига номзоди қўйилган. Аммо мукофот Рене Зеллвегер ва Лора Дернга насиб қилган.
Изоҳ (0)