Шимолий Корея тез орада 3000 тонналик янги ядровий сувости кемасини ишга туширишни режалаштирмоқда. Бу ҳақда Жанубий Корея ва АҚШнинг разведка хизматлари маълумотларига таяниб, Yonhap агентлиги хабар берди.
«Жанубий Корея ва АҚШнинг разведка органлари маълумотларига кўра, Шимолий Корея 2019 йилнинг июль ойида тақдим этилган 3000 тонналик сувости кемасининг қурилишини якунлади», — деб хабар берилган агентлик манбасида.
Агентликнинг маълум қилишича, Шимолий Корея ҳукумати сувости кемасини юқори самара билан тақдим этиш, шу жумладан, АҚШга босим ўтказиш учун қулай вақтни кутяпти.
Сувости кемаси Pukguksong-3 каби учта сувости баллистик ракеталарини олиб юриш имкониятига эга бўлади.
Аввалроқ Американинг 38 North портали Шимолий Кореядаги Симпхо Шимолий кемасозлик ҳудудида қайта жойлаштириш ҳаракатлари кузатилганини маълум қилди. Бу ҳаракатлар яқин орада Шимолий Кореянинг янги сувости кемаси қурилиши тугалланиб, фойдаланишга топширилиши мумкинлигидан дарак беради, деб ёзди портал.
2021 йилнинг январь ойида Пхенянда Корея Меҳнат партиясининг VIII қурултойи якунига етиши муносабати билан ҳарбий парад бўлиб ўтди, унда сувости кемаларининг баллистик ракеталари намойиш этилди. Кореянинг Марказий телеграф агентлиги ракеталарни «дунёнинг энг мукаммал қуроллари» деб атади. Шимолий Кореядаги ОАВлар нашр этган суратларга таяниб, Reuters’нинг ёзишича, гап 2020 йилнинг октябрь ойида намойиш этилган Pukguksong-4’нинг такомиллашган версияси — Pukguksong-5 ҳақида кетаётган бўлиши мумкин.
Шунингдек, АҚШ мутахассислари Шимолий Кореянинг Йонбён ҳудудидаги ядровий объектларда фаолликни рўйхатга олди ва мамлакат плутонийни қайта ишлаш ёки шунга тайёргарлик кўришда гумон қилди. АҚШ ҳукумати Пхеняннинг бу ҳаракатларини Сеул ва Вашингтон билан қарама-қаршиликни кучайтириш учун ўйлаган стратегиясининг бир қисми, деб атади.
Эслатиб ўтамиз, 25 март куни Шимолий Корея иккита тактик ракетанинг муваффақиятли синовлари ҳақида маълум қилган. Кореялик ҳарбийлар хабарига кўра, иккала ракета ҳам КХДР шарқий қирғоқларидан 60 километр масофада жойлашган нишонга муваффақиятли бориб тегган.
Бундан ташқари, КХДР Япон денгизига қарата иккита баллистик ракетани учирди. Ракета синовлари ҳақида Япония Мудофаа вазирлиги ва Жанубий Корея ҳарбийлари маълум қилган. Бунгача эса АҚШ ҳарбийлари Пхенян тез орада баллистик ракеталар учиришни қайта бошлаши ҳақида огоҳлантирган эди.
Кейинроқ Шимолий Корея томонидан баллистик ракеталарнинг учирилиши АҚШ ва Япониянинг доимий таҳдидлари олдида ўзини ҳимоя қилиш бўлгани ҳақида айтилди.
«Яқинда амалга оширилган янги бошқарилувчи тактик ракеталарнинг синовдан ўтказилиши суверен давлатнинг ўзини ўзи ҳимоя қилиш бўйича умумбашарий ҳуқуқидан фойдаланишга тенг ҳаракат бўлди», — деди қўмита котиби.
Изоҳ (0)