Қирғизистонда 2020 йил кузида юз берган исёнлар мамлакат тарихидаги «энг нопок сайловлар» оқибатида келиб чиққан эди, деб маълум қилди президент Садир Жапаров конституцияга тузатишлар киритиш ва маҳаллий ҳукумат органларига сайловлар бўйича овоз бериш бўлиб ўтаётган кунда.
«Октябрдаги халқ исёнлари тарихимиздаги ‘энг нопок сайловлар’ натижасида юз берди. Ҳукумат ўшанда халқнинг овозини тингламади», — деди у.
Жапаровнинг қўшимча қилишича, январь ойида Қирғизистон халқи биринчи марта республикада бошқарув шаклини мустақил равишда танлашга муваффақ бўлган. Сайловчиларнинг 33,08 фоизи қатнашган референдумда аксарият (80 фоиздан ортиқ иштирокчи) бошқарувнинг президентлик шаклини ёқлаб овоз берган. Шундан кейин, деди президент, Қирғизистоннинг бош қонунига тузатиш киритиш зарурати пайдо бўлган.
«Қирғизистон ўттиз йилдан буён ўз йўлини топишга уринмоқда, бу вақт ичида бир қатор ғалаёнлар бўлиб ўтди. Буларнинг барчаси ният ва интилишларимизнинг изчил эмаслигидандир… Биз ўтмишдан сабоқ чиқариб, бундан аввалги ҳукуматнинг хатоларини такрорламаслигимиз керак», — деди Жапаров. У мамлакатда тинчлик ва барқарорликни кафолатловчи ҳалол сайловларни ўтказишга чақирди.
Эслатиб ўтамиз, бугун, 11 апрель куни Қирғизистонда конституцияга ўзгартиришлар киритиш тўғрисидаги референдум ва маҳаллий органларга сайловлар бўлиб ўтмоқда. Янги лойиҳага кўра, ҳукумат тузилиши ва таркиби президент томонидан белгиланади, бош вазир бошчилигидаги ҳукумат фаолияти президент маъмурияти томонидан таъминланади. Ҳукумат раҳбари, ўз навбатида, президент маъмуриятига раҳбарлик қилади. Лойиҳада, шунингдек, Қирғизистон конституциявий судини тузиб, конституциявий палатани Олий суд таркибидан чиқариш таклиф этилади. Референдум бўлиб ўтган деб тан олиниши учун унда жами сайловчиларнинг камида 30 фоизи овоз бериши керак.
2020 йил октябри бошида Қирғизистонда парламент сайлови якунлари билан боғлиқ оммавий норозиликлар бўлиб ўтди. Қонунчилик мажлисига сайловда қатнашган 16 та партиянинг атиги тўрттаси ўтди, намойишчилар натижалардан норози бўлиб, қайтадан сайлов ўтказишни талаб қилди. Оқибатда Қирғизистоннинг ўша пайтдаги президенти Сооронбой Жээнбеков 2020 йил 15 октябрь куни истеъфога чиқди.
Январь ойида бўлиб ўтган муддатидан аввалги президент сайловларида Жээнбеков кетганидан кейин ҳукумат тепасига келган Жапаров ғолиб бўлди, у овозларнинг қарийб 80 фоизини тўплади. Жапаров президент ҳокимиятини мустаҳкамлаш билан шуғулланишини маълум қилди.
Изоҳ (0)