Туркия ўз ҳарбий-ҳаво кучлари учун Италиядан машғулот вертолётларини сотиб олиш бўйича битимни номаълум муддатга тўхтатиб қўйди. Бу ҳақда La Repubblica хабар берди, деб ёзади «РБК».
Туркия Италиянинг Leonardo концернидан АW169 вертолётларини сотиб олиши, улар эски Agusta-Bell 206 вертолётлари ўрнини босиши керак эди. 70 миллион евролик шартнома эса яқин кунларда имзоланиши кутилаётган эди, аммо Анқара Италия бош вазири Марио Драгининг Туркия президенти Ражаб Тоййиб Эрдўғонга нисбатан баёноти фонида жараённи тўхтатиб қўйди.
Гап 7 апрель куни Анқарада Еврокомиссия вакилларининг Туркия етакчиси билан учрашувидан кейин юз берган воқеа ҳақида бормоқда. Ўшанда Еврокомиссия раҳбари Урсула фон дер Ляйенга ўриндиқ етмай қолган, шу сабабли у диванга ўтиришга мажбур бўлган эди, бу эса дипломатик протокол бўйича унинг мақомини пасайтиради, деб ёзади газета.
Драги ушбу вазиятни хунук деб атаб, Еврокомиссия раҳбари дуч келган камситишдан қайғуга чўмганини билдирди. «Уларни ўз ҳолича атайдиган бўлсак, бу диктаторлар билан фикрларни изҳор қилишда дангал бўлиш керак ва ўз мамлакатимиз манфаатлари йўлида ҳамкорлик қилишга тайёр бўлиш керак», — деди Италия бош вазири.
Унинг шу сўзлари туфайли Туркия Римга жами 150 миллион евро келтириши мумкин бўлган битимни тўхтатди. Газета маълумотларига кўра, бош вазирнинг гаплари сабабли бошқа шартномалар ҳам, шу жумладан, энергетика соҳасидаги битимлар ҳам хавф остида қолган.
La Repubblica қайд этишича, Анқара Драгининг сўзлари учун расман узр сўралишига эришиш мақсадида Италия ҳукуматига босим ўтказиш учун мана шундай иқтисодий воситалардан фойдаланмоқда.
Аввалроқ Туркия ташқи ишлар вазири Мавлуд Чавушўғли учрашувда ўриндиқ етишмай қолиши билан боғлиқ воқеа юзасидан мамлакатга нисбатан айбловларни адолатсиз деб атаган эди. У Twitter’да Италия бош вазири Марио Драгининг Туркия президенти Ражаб Тоййиб Эрдўғонни диктатор деб атагани юзасидан пост қолдириб, Драгининг баёнотини номақбул ва популистик деб атади, Туркия президенти ҳақидаги гапларини эса ярамас ва асоссизга чиқарди. Кейинроқ Италия элчиси Массимо Гайяни ҳодиса юзасидан Туркия ташқи ишлар вазирлигига чақирилгани хабар берилди.
Мавзуга доир:
Изоҳ (0)