Грузия бир йил олдин Украинадан чақириб олинган элчисини қайтаришга қарор қилди

Грузия деярли бир йил олдин чақириб олинган элчиси Теймураз Шарашенидзени тез орада Украинага қайтаради. Бу ҳақда Грузия Ташқи ишлар вазири Давид Залкалианига таяниб, Meduza хабар берди.

Залкалиани тез кунларда Шарашенидзенинг Киевга қайтарилиши тўғрисида қарор қабул қилинишини маълум қилди. Унинг сўзларига кўра, Украина атрофидаги ҳарбий зиддиятларнинг кучайиши фонида, Грузия «ўз элчисининг жойида бўлмаслигига йўл қўя олмайди». Шунингдек, у Грузиянинг Украина билан муносабатларини жадал ривожлантиришга ҳаракат қилаётганини таъкидлади.

Маълумот учун, Украина фуқаролигини олган Грузиянинг собиқ президенти Михаил Саакашвили Украина ислоҳотлари миллий кенгаши ижроия қўмитасининг раҳбари этиб тайинланганидан кейин, 2020 йилнинг май ойида Грузия ўз элчиси Теймураз Шарашенидзени маслаҳатлашиш учун Киевдан чақириб олган эди.

Ўшанда Залкалиани «Грузия суд тизими томонидан судланган ва қидирувда бўлган шахснинг стратегик ҳамкор сифатида тайинланиши саволлар туғдиради», — деб таъкидлаган эди.

Шунингдек, Тбилиси Грузияда судланган шахснинг Украинада давлат идорасига раҳбар этиб тайинлангани сабабли демарш (бир давлатнинг бошқа давлатга илтимоснома ёки талаб билан чиқиши) эълон қилди. Тбилиси ҳукумати Киев эътиборини Саакашвилининг доимий равишда Грузия ички ишларига аралашаётганига қаратган.

Аввалроқ Михаил Саакашвили Грузия мухолифатини норозиликларни тўхтатмасликка чақиргани ҳақида хабар берилганди, У, шунингдек, Тбилисида «Ягона миллий ҳаракат» мухолиф партия раиси Никанор Мелиянинг ҳибсга олинишини қоралади. Саакашвилининг айтишича, уни қўлга олганларнинг ўзлари «жуда узоқ вақт қамоқда ўтиради».

Эслатиб ўтамиз, Грузия полицияси 23 февраль куни «Ягона миллий ҳаракат» (ЯМҲ) мухолифат партияси етакчиси Никанор Мелияни ҳибсга олганди. У 2019 йилда тартибсизликлар уюштирганликда ва Грузия парламентига қилинган ҳужумда иштирок этганликда айбланмоқда.