Буюк Британия қироличаси Елизавета II нинг турмуш ўртоғи, Эдинбург герцоги Филиппнинг дафн маросими 17 апрель куни бўлиб ўтади. Бу ҳақда Букингем саройи маълум қилди.
Маросим маҳаллий вақт билан 15:00 (Тошкент вақти билан 19:00) да бошланиб, телевидение орқали трансляция қилинади. Филипп Виндзордаги Авлиё Георгий бутхонасига дафн этилади.
Коронавирус пандемияси туфайли маросим иштирокчилари сони чекланади. Тобут кўтарувчилар, Виндзор декани ва Кентерберий архиепископидан ташқари, данф маросимида 30 киши қатнашади. Улар орасида шаҳзода Гарри ҳам бўлади, маросимда қатнашиш учун у АҚШдан учиб келади. Аммо унинг рафиқаси Меган Маркл дафн маросимига келмайди: ҳомиладорлиги сабабли шифокорлар унга парвоз қилмасликни тавсия этган.
Дафн маросими кунигача Буюк Британияда миллий мотам давом этади. Бу вақт мобайнида мамлакатда давлат байроқлари туширилади (қиролича ўз қароргоҳида эканлигини билдирувчи қироллик стандартидан ташқари). Қироллик оиласи икки ҳафталик мотамга амал қилади.
10 апрель куни қироллик шаҳарларида, ҳарбий базаларида ва кемаларида шаҳзоданинг хотирасига замбараклардан тўп отиб салют берилди. Тўплар 41 мартадан отилди. Бундай салютларни Австралия ва Янги Зеландия армиялари ҳам амалга оширди.
Буюк Британия бош вазири Борис Жонсон Эдинбург герцоги Филипп билан видолашув маросимида иштирок этмаслигини маълум қилди, шу тариқа у дафн маросимида марҳумнинг қариндошлари учун кўпроқ жой бўлишини истаган.
«Бош вазир доим қироллик саройи манфаатларидан келиб чиқиб иш тутишни истаган, шунинг учун дафн маросимида оиланинг иложи борича кўпроқ аъзолари қатнашишини хоҳламоқда», — дейилади бош вазир девони тарқатган хабарда.
Букингем саройи фуқаролардан қироллик қароргоҳларига гуллар ва бошқа эсдалик совғалар юбормасликни, бунинг ўрнига кичик хайрияларни амалга оширишни сўради. Бундан ташқари, сарой сайтида онлайн китоб очилган бўлиб, унда ҳамдардлик билдириш ва хайрия қолдириш мумкин.
Эслатиб ўтамиз, Шаҳзода Филипп 9 апрель куни — 100 ёшга тўлишига икки ой қолганида вафот этди. 2020 йил ноябрь ойида Елизаветта II ва шаҳзода Филипп ўз тўйлари бўлиб ўтган сананинг 73 йиллигини нишонлаган эди. Шаҳзода Филипп соғлиғи ёмонлашгани туфайли Букингем саройининг расмий тадбирларида 2017 йилдан буён иштирок этмай келаётганди. У 2021 йилнинг февраль ойида шифохонага ётқизилганди. Шаҳзода Филипп у ерда бир ой даволанган ва юрагини операция қилдирган. Шундан сўнг унга касалхонадан жавоб берилган ва у ўзининг ёзги қароргоҳига қайтиб келган эди.
Изоҳ (0)