Gruziya deyarli bir yil oldin chaqirib olingan elchisi Teymuraz Sharashenidzeni tez orada Ukrainaga qaytaradi. Bu haqda Gruziya Tashqi ishlar vaziri David Zalkalianiga tayanib, Meduza xabar berdi.
Zalkaliani tez kunlarda Sharashenidzening Kiyevga qaytarilishi to‘g‘risida qaror qabul qilinishini ma’lum qildi. Uning so‘zlariga ko‘ra, Ukraina atrofidagi harbiy ziddiyatlarning kuchayishi fonida, Gruziya “o‘z elchisining joyida bo‘lmasligiga yo‘l qo‘ya olmaydi”. Shuningdek, u Gruziyaning Ukraina bilan munosabatlarini jadal rivojlantirishga harakat qilayotganini ta’kidladi.
Ma’lumot uchun, Ukraina fuqaroligini olgan Gruziyaning sobiq prezidenti Mixail Saakashvili Ukraina islohotlari milliy kengashi ijroiya qo‘mitasining rahbari etib tayinlanganidan keyin, 2020-yilning may oyida Gruziya o‘z elchisi Teymuraz Sharashenidzeni maslahatlashish uchun Kiyevdan chaqirib olgan edi.
O‘shanda Zalkaliani “Gruziya sud tizimi tomonidan sudlangan va qidiruvda bo‘lgan shaxsning strategik hamkor sifatida tayinlanishi savollar tug‘diradi”, — deb ta’kidlagan edi.
Shuningdek, Tbilisi Gruziyada sudlangan shaxsning Ukrainada davlat idorasiga rahbar etib tayinlangani sababli demarsh (bir davlatning boshqa davlatga iltimosnoma yoki talab bilan chiqishi) e’lon qildi. Tbilisi hukumati Kiyev e’tiborini Saakashvilining doimiy ravishda Gruziya ichki ishlariga aralashayotganiga qaratgan.
Avvalroq Mixail Saakashvili Gruziya muxolifatini noroziliklarni to‘xtatmaslikka chaqirgani haqida xabar berilgandi, U, shuningdek, Tbilisida “Yagona milliy harakat” muxolif partiya raisi Nikanor Meliyaning hibsga olinishini qoraladi. Saakashvilining aytishicha, uni qo‘lga olganlarning o‘zlari “juda uzoq vaqt qamoqda o‘tiradi”.
Eslatib o‘tamiz, Gruziya politsiyasi 23-fevral kuni “Yagona milliy harakat” (YaMH) muxolifat partiyasi yetakchisi Nikanor Meliyani hibsga olgandi. U 2019-yilda tartibsizliklar uyushtirganlikda va Gruziya parlamentiga qilingan hujumda ishtirok etganlikda ayblanmoqda.
Izoh (0)