Тошкент метрополитенида поезднинг очиқ эшик вагон билан ҳаракатлангани бўйича тергов ўтказилиб, бу юзасидан «Ўзбекистон темир йўллари» қўшимча маълумот берди.
Маълум қилинишича, хизмат вазифаларини нотўғри бажаргани учун машинист, электромонтёр-чилангар ва электр ҳаракатланувчи таркибнинг катта устаси эгаллаб турган лавозимидан озод этилган.
Шунингдек, электр базаси бошлиғининг электр ҳаракатланувчи таркибини таъмирлаш бўйича ўринбосари иш ҳақининг 40 фоизи миқдорида жаримага тортилган.
Маълумот учун, 10 апрель куни Тошкентда метро поезди йўловчилар ҳаётини хавфга қўйиб очиқ эшик билан ҳаракатлангани акс этган видео тарқалди.
Эслатиб ўтамиз, Тошкентда 8 апрель куни Сергели ерусти метросида поезд ярим йўлда тўхтаб қолиб, йўловчилар темир йўл бўйлаб пиёда юришга мажбур бўлгани, «Тошкент метрополитени» УК раҳбарияти воқеа жойида вазиятнинг сабабларини аниқлаётгани ҳақида хабар берилган эди. Тўхтаб қолган метро йўналиши — Олмазор станциясидан Қипчоқ станциясигача бўлган оралиқда вақтинчалик автобус йўналиши ҳаракати йўлга қўйилган. «Тошкент метрополитени» УК матбуот хизмати Сергели йўналишидаги поездлар ҳаракати соат 16:45 да тикланганини маълум қилди.
Бундан ташқари, 9 апрель куни «Беруний» метро бекатида икки поезд тўқнашгани айтилган видео тарқалди. Тошкент метрополитенининг ҳолат бўйича расмий изоҳида таъкидланишича, аслида тўқнашув содир бўлмаган, балки поезд бошқа поезд ёрдамида шатакка олиб «Беруний» бекатига олиб келинган.
Изоҳ (0)