«Тошкент—Шовот» йўналишидаги поездда ўз ўрнини пуллашга уринган вагон кузатувчиси «Ўзтемир йўлйўловчи» акциядорлик жамияти буйруғи билан ишдан бўшатилди. Бу ҳақда воқеалар иштирокчиси бўлган «Дарё» мухбири маълум қилди.
Маълум бўлишича, «Дарё» мухбири 2021 йилнинг 3 апрель куни «Тошкент—Шовот» йўналишидаги поездда Бухорога қайтиш мақсадида чиптада белгиланган вагонга чиққан. Журналист вагонда кўрсатилган ўрнига жойлашмай туриб, вагон кузатувчиси унга ўз ўрнини пуллашга уринган.
Эгнидаги хизмат кийимида Нодир Исаев Бахтиёрович ёзуви қайд этилган вагон кузатувчиси журналистга ўзига тегишли бўлган купедаги ўрнини 100 минг сўм эвазига беришини, алоҳида хонага ҳеч ким кирмаслигини ва уни безовта қилмаслигини билдирган.
Суҳбат орасида вагон кузатувчиси: «Пласкартга билет олсаларингиз, буёғи билан гаплашилса, арзон тушади», — дея қўшимча ҳам қилган. Журналист вагон кузатувчисини суҳбатга тортиб, йўл ҳақини арзонлаштириш бўйича яна қандай сирлар борлигига қизиққан.
Журналист: 100 минг сўм қиммат-да! 50 минг сўм бўлмайдими?Вагон кузатувчиси: Йўқ, менинг «расход»им бор.Журналист: Қанақа «расход»?Вагон кузатувчиси: Мана шу жойнинг «расход»и бор, одам қўйсак... Тўғри тушунинг!Журналист: Ўзи вагон кузатувчиси учун белгиланган ўринга билет сотилмайди-а?Вагон кузатувчиси: Йўқ!Журналист: Ҳа, аммо сал қимматроқ экан-да. Шундоқ ҳам билетни 150 минг сўмдан ортиққа олсак. Бу пуллар ўзингизга қолса.Вагон кузатувчиси: Менга қолмайди!Журналист: Кимга қолади?Вагон кузатувчиси: Одамлар бор-да, сизга тушунтириб бермайман-ку!
Журналист Facebook’да бу ҳақда пост ёзгач, ижтимоий тармоқ фойдаланувчилари ҳолатни қоралаган. «Ўзтемир йўлйўловчи» акциядорлик жамияти раҳбарияти эса вазиятга эътибор қаратган.
«Дарё» мухбирига кўра, ҳолат «Ўзтемир йўлйўловчи» акциядорлик жамиятининг маркетинг ва сервис хизматлари бўйича директори Суннатилла Ҳамидов томонидан ўрганилган. Ўрганиш давомида ушбу масала ишчи-ходимлар иштирокида муҳокама қилинган. Ва ҳақиқатан ҳам муаммога сабаб бўлган ҳолатлар юзага келгани очиқланган. «Ички меҳнат тартиб қоидалари» талаблари бузилгани учун поезд бошлиғи (А.Ҳакимов) ҳамда маҳаллий йўналишдаги йўловчи-поездларда йўловчиларга хизмат кўрсатиш филиалининг поезд жамоаларини тузиш бўйича етакчи муҳандиси (Х.Санатуллаев)га нисбатан Меҳнат кодексининг тегишли моддаларига асосан интизомий жазо чораси қўлланилган.
«Вагон кузатувчиси Нодир Исаевнинг ўз хизмат вазифасини суиистеъмол қилишга урингани очиқланди. У билан тузилган меҳнат шартномаси Меҳнат кодексининг 99-моддасига асосан, 2021 йилнинг 5 апрелидан бошлаб бекор қилинди. Вагон кузатувчисига ишлаган даври учун фойдаланилмаган меҳнат таътилининг 12 иш кунига пуллик компенсация тўланади ва ихтиёрида бўлган барча ҳисобот ҳужжатлари ва товар-моддий бойликлари қонунда белгиланган тартибда қабул қилиб олинади», — деди Суннатилла Ҳамидов.
Суннатилла Ҳамидовга кўра, айни пайтда вагон кузатувчисининг ўз ўрнини сотиш билан боғлиқ «расход»ни қайси одамлар билан бўлишиши ҳақидаги муносабати қандай занжир ҳосил қилиши ўрганилмоқда.
Шунингдек, «Ўзтемир йўлйўловчи» акциядорлик жамияти раҳбарияти ўз муносабатида соҳадаги камчиликларнинг олдини олишда ва йўловчиларга хизмат кўрсатиш соҳасида жамоатчилик эътиборининг муҳимлигини таъкидлаган ва миннатдорлигини билдирган.
Изоҳ (0)