Тошкент шаҳрида вакцинанинг ножўя таъсирларини даволаш учун 4 та шифохона тайёрлаб қўйилгани маълум бўлди

Коронавирусга қарши эмланган фуқароларда кузатилган ножўя таъсирларга қарши курашиш мақсадида Тошкентда ташкил этилган 81 та эмлаш пункти 4 та шифохонага бириктирилган. Бу ҳақда СЭС ахборот хизмати «Gazeta.uz»га маълум қилди.

Шифохоналар рўйхати:

• Учтепа туманидаги шаҳар тез тиббий ёрдам клиник шифохонаси;
• Шайхонтоҳур туманидаги 1-сон шаҳар клиник шифохонаси;
• Яшнобод туманидаги 4-сон шаҳар клиник шифохонаси;
• Юнусобод туманидаги 7-сон шаҳар клиник шифохонаси.

Эслатиб ўтамиз, аҳолини коронавирусга қарши эмлаш тадбирлари 1 апрелдан бошланди. Эмлаш дастлаб қариялар, соғлиқни сақлаш ходимлари, ОАВ вакилларида кўнгилли тарзда ўтказилади. 7 апрель ҳолатига кўра, Ўзбекистонда коронавирус инфекциясига қарши жами эмланганлар сони 64 852 нафарга етди. Улар AstraZeneca ва Ўзбекистон—Хитой ҳамкорлигида ишлаб чиқилган ZF-UZ-VAC 2001 вакцинаси билан эмланмоқда. Ўзбекистонда тўлиқ эмлаш курсини тамомлаган фуқароларга QR-кодли сертификат берилади.

«Юксалиш» умуммиллий ҳаракати эмлаш тадбирлари ҳақида интернет фойдаланувчиларининг кайфияти ва фикрларини билиш мақсадида ўтказилган (29—31 март) онлайн-сўров натижаларига кўра, Ўзбекистонда аҳолининг кўпчилиги коронавирусга қарши эмланишни истамаётгани маълум бўлганди.