Ўзбекистонда маҳаллийлаштириш ҳисобига 3 млрд долларлик импорт маҳсулотлари ўрнини қоплаш режалаштирилмоқда — Сардор Умрзоқов

Маҳаллийлаштириш дастури Ўзбекистонга йил охирига қадар қўшимча 3 миллиард доллардан ортиқ миқдордаги импорт ўрнини босувчи маҳсулотлар ишлаб чиқаришни ташкил этиш ва экспорт ҳажмини 1 миллиард долларга ошириш имконини беради. Бу ҳақда 5 апрель куни Тошкентда бошланган «Иннопром» халқаро саноат кўргазмасида бош вазир ўринбосари — инвестициялар ва ташқи савдо вазири Сардор Умрзоқов маълум қилди, деб хабар беради «Gazeta.uz».

Унинг сўзларига кўра, маҳсулот ишлаб чиқаришни маҳаллийлаштириш дастури тадбиркорлик субъектларига Ўзбекистондаги 2300 дан ортиқ лойиҳаларда иштирок этиш ҳамда бир қатор имтиёзлардан фойдаланиш, шу жумладан, устувор ер участкалари, бинолар ва иншоотларни олиш имкониятини беради.

Сардор Умрзоқовнинг маълум қилишича, ташқи савдо режимини либераллаштириш бўйича ишлар олиб борилмоқда, унинг доирасида «кўплаб маҳсулотларга импорт, божхона тўловлари ва акциз солиқлари сезиларли даражада камайтирилди ёки тўлиқ бекор қилинди», шунингдек, импорт бўйича барча миқдорий чекловлар бекор қилинди.

Бош вазир ўринбосарининг сўзларига кўра, сўнгги тўрт йил ичида мамлакат ЯИМда саноат улуши 26 фоиздан 36 фоизга ошган, саноат ишлаб чиқариш ҳажмлари — 3,3 баравар, жумладан, металлургия саноати — 10 баравар, автомобиль — 8 баравар, электротехника — 5 баравар, кимё — 3 баравар, текстиль — 2,6 баравар, фармацевтика — 2 баравар, тоғ-кон соҳаси — 3 баравар ошган. Саноат маҳсулотларининг экспортдаги улуши 24 фоиздан 33,6 фоизга қадар ўсган.

Эслатиб ўтамиз, 2020 йилнинг 10 мартида бош вазири Абдулла Арипов «2020-2021 йилларда ички ва ташқи бозорларда харидоргир маҳсулотларни ишлаб чиқаришни маҳаллийлаштириш дастури тўғрисида»ги қарорни имзолаган эди. Дастурга мувофиқ, ҳудудларда 3,1 миллиард доллар миқдорида импорт ўрнини босувчи маҳсулотларни маҳаллий ишлаб чиқаришни бошлаш ва 351,6 миллион долларга экспорт қилиш режалаштирилган. Бунинг учун 2300 дан ортиқ лойиҳа амалга оширилади.

Февралда Ўзбекистонда 500 дан ортиқ хориж товарларини давлат харидларида иштирок этишини тақиқланган эди.

Маълумот учун, 2020 йил якунларига кўра, Ўзбекистоннинг ташқи савдо айланмаси 36,3 миллиард долларни ташкил этди (13,1 фоизга камайган), экспорт — 15,1 миллиард доллар (-13,4 фоиз), импорт — 21,2 миллиард доллар (12,8 фоизга камайган). Натижада салбий салдо баланси 6 миллиард долларга кўтарилди.